Channai, Nailar:
U Myntri Rangbah ka Tamil Nadu u M K Stalin u la dep ban pynbna ba un sa pyllait paidbah ïa ka Tamil Pudhalvan Scheme ha ka 9 tarik, Nailar ha Coimbatore.
Kane ka skhim ka thmu ban ai jingïarap da T.1,000 man u bnai ïa ki khynnah shynrang kiba bteng ïa ki jingpule ha ki kyrdan ba kham shalor, hadien ba ki la pyndep ïa ki klas 6 haduh 12 ha ka ktien Tamil ha ki skul sorkar bad ki skul ba hap hapoh ka jingkhmih jong ka sorkar.
Ka jylla ka la mang T.360 klur ha une u snem mang tyngka na ka bynta kane ka skhim.
U Myntri Rangbah u la ïadonlang ha ka jingïalang ban sam ïa ki jingïarap ha ka pule puthi sha ki samla pule jong ka Kapaleeswarar Arts and Science College, kaba la pynïaid da ka tnad HR&CE.
U la ong ba kane ka kolej ka dei kawei na ki jingjop jong kane ka tnad, ba la ïalam da u Myntri u PK Sekarbabu. U la ong,
“Ha kine ki lai snem ba la dep, ki don haduh 1,405 ngut ki samla pule kiba la ïoh ïa kum kane ka jingïarap. Hapoh ka jingtreikam jong ka Pudhumai Penn Scheme, ki la don 2.73 lak ngut ki khynnah kynthei kiba la ïoh ïa ka jingïarap kaba T.1,000 man u bnai na ka bynta ban bteng ïa ki jingpule jong ki ha ki kyrdan kiba kham shalor.”
Halor ki jingthmu pynroi ha Kolathur Assembly konstitwensi – ba la mihkhmat da u Myntri Rangbah ka jylla – u la ong ba ngi la pynkylla ïa ka sha ka konstitwensi Model.
“Wat tharai ba nga long uba sngewrit haba nga ong ïa kane. Baroh ki 234 tylli ki konstitwensi ki dei ki konstitwensi jong nga, khlem da kheiñ na ka liang synshar ne ka liang pyrshah ne ki seng ba ïatreilang kiba mihkhmat na ka bynta jong ki. Ym slem shuh, ba ka Kolathur konstitwensi kan sa ïoh ïa ka jaka treikam kaba thymmai ha ka thaiñ, ka jaka treikam jong u Police Deputy Commissioner, ka thanad pulit, ka station pynlip ding, bad ka Sub-registrar ophis,” u la ong da kaba bynrap ba ïa ki kam kiba kum kine yn sa pyntreikam ha baroh ki konstitwensi, katkum ka ka jingkyrpad jong ki MLA kiba dei khmih.
Katba ha kawei pat ka prokram u Myntri Rangbah u la sam ïa ki kor suh jaiñ sha ki 355 ngut ki khynnah skul, ki Laptop sha ki 125 ngut bad ki ïitkhmat sha ki 1000 ngut ki khynnah skul.
Hadien kane, u la sam ruh ïa ki jingïarap ban ai jingmyntoi sha ki 147 ngut ki nongïoh jingmyntoi ha ophis u MLA ka Kolathur.
Nalor kane, u la leit ruh ban jurip ïa ka Dialysis Centre ba la wanrah da ka Chennai Metropolitan Development Authority.
U Myntri ka Higher Education u K Ponmudi, u Minister ka HR&CE u P K Sekarbabu, u Mayor ka Chennai u R Priya, Tiruvannamalai Adheenam Ponnambala Desika Paramachariya Swamigal, Mayilam Bommapuram Adheenam u Sri Sivagnana Balaya Swamigal bad kiba bun kiwei pat ki heh sorkar ki la ïadonlang ha kane ka por.
