Hyderabad, Nailar:
Ka Telangana High Court ka la phah shithi sha ka sorkar jylla halor ka bha ka miat jong ki ‘riew paidbah kiba la dawa bad kyrpad ïa ki bor ba dei khmih ba kin pynshitom da kaba tyngeh pyrshah halor ki jingtih beaiñ ïa ki marpoh khyndew ha ki thaiñ Khadgam-Shetlur jong ka Bichukunda kaba don ha Kamareddy distrik.
Ka kynhun jong ki nongbishar kaba kynthup ïa u Chief Justice Alok Aradhe bad u Justice J Sreenivas Rao, ki la pynkylla ïa kane ka shithi ba la phah da u A Prakash, u President jong ka Bar Association jong ka thaiñ Bichukunda sha ka jingkyrpad PIL bad la buh ïa ka na ka bynta ban pynlong ïa ka jingbishar bniah.
U nongmudui u la ong ba ki jingtih beaiñ ïa ki marpoh khyndew ki dang ïai bteng haduh mynta. Kine ki kam ki la ïai bteng ha kaba ka la wanrah ïa ka jingduhnong kaba T. 20-30 lak ha lad kamai.
Ka shithi ka la ong ba ka jingai jingbit ba la ai da ka sorkar BRS ba hashwa na ka bynta ka jingtih shyiap ha ki hynriew tylli ki jaka kiba don ha ka thaiñ Khadgam-Shetlur ka la kut noh bad kam treikam shuh.
Hadien ba la ïohi ïa ka shithi, ka kynhun ki nongbishar ka la phah shithi sha ki Principal Secretaries jong ka Mines and Geology, Revenue, Home bad Transport Department, MD jong ka TSMDC, District Collector bad SP jong ka Kamareddy distrik.
