Mumbai, Nailar:
Ka seng Aam Aadmi Party (AAP) ka la dep ban pynbna ba kan sa ïakhun hi dalade ïa ka ilekshon Assembly ha Maharashtra bad kan pynïakhun kyrtong ha baroh 36 tylli ki konstitwensi ha Mumbai. Ïa kane la pynbna ha ka jingïalang bad ki nongthoh khubor da ka President jong ka seng ha Mumbai, ka Preeti Sharma Menon, kaba la ong ruh ba ka seng kam pat shim ïa ka jingkhot ïa kiwei pat ki bynta jong ka Jylla.
“Ha kiwei pat ki bynta jong ka Maharashtra, ki para ba ïatreilang bad ki nongïarap jong ngi ki long kiba pyntyllun ïa ka kam bad ki jingpynkhreh na ka bynta kane ki dang ïaid shakhmat,” ka la ong. Kum ka jingong ba ka seng BJP ka long kum ka seng kaba pyrshah ïa ka Maharashtra bad pyrshah ïa ka Mumbai, ka la kynnoh ïa katei ka seng namar ka jingthut jong ki jingtei jong ka Mumbai.
“Ym pat don satia ka jingïakhih paidbah ha kano kano na ki 27 tylli ki Municipal Corporation jong ka Maharashtra, kynthup ïa ka BMC ha Mumbai. Ka jingai ïing ka dang long ka jingeh kaba khlem pat lah ban pynbeit ne weng bad ki jaka Slum ki la nang kham sniew. Ki riew pynkheiñ aiñ ki la shimti ïa ki kam kiba ïadei bad ki jingshna ïing kum ki kontraktor, wat ki projek kiba kham kongsan ruh ki la shah knieh noh na ka nongbah sha Gujarat,” ka la ong.
Ka President jong ka seng AAP ha ka nongbah ka la ong ruh ba ka seng jong ka kan ïai bteng ban kyrshan ïa ka kynhun synrop jong ki seng ka liang pyrshah ka INDIA ha ka kyrdan jong ka ri wat lada ka seng ka ri ban ïakhun ïa ka ilekshon pyrshah ïa ki seng kiba don ha katei ka Block ha ka ilekshon Assembly ha ka jylla.
