Bhubaneswar, Nailar:
Ki pulit jong ka Odisha ha kine ki khyndiat sngi ba la leit, ki la buh ka jingmaham pyrshah ïa ki nongshong shnong halor ka jingthombor ïa ki briew kiba kren ïa ka ktien Bengali halor ka jingsuba ba ki dei ki poiwir kiba la wan buhai shnong na Bangladesh ha kane ka por ba mih ki jingïakynad bajur ha kaba ki la don bun ki briew kiba la phet shnong bad pan jaka rieh shipor na ki ri ba marjan.
Kane ka jingmaham jong ka sorkar ka la long hadien ba la ïoh jingtip shaphang ka jingnang bun jong ki jingjia jong ki jingshah leh donbor bad shah thombor ki briew kiba kren ïa ka ktien Bengali ha kiba bun ki bynta jong ka jylla, khamtam ha kine ki khyndiat sngi ba la leit.
“Kiba bun ki jingjia ki la jia ha bakut jong ka taïew ba la lah haba ki la don kumba katto katne tylli ki kynhun kiba la leit ker tawiar ïa ki Bengali naba ki suba ba ki dei ki poiwir. Ki SP jong baroh ki distrik ki la shah bthah ba ki la dei ban pynshitom da kaba tyngeh ïa ki runar kiba ju leh ïa kum kine ki jait kam,” la ong u ADG ka Law and Order u Sanjay Kumar.
Kumba la ïathuh ka tyllong khubor, la ong ba ki pulit ki la ïoh jingtip ba ki la don kumba san tylli ki jingjia ba thombor ïa ki nongtrei kiba ju trei bylla bad ki nongkhaïi sha kylleng ki jaka kiba dei ki Bengali ha ki distrik kum ha Jagatsinghpur, Bhadrak, Jharsuguda bad Gajapati.
U Kumar u la ong ïa ki nongshong shnong ba ki la dei ban pyntip sha ki bor jong ka aiñ lada jia ba ki lap ba don ki nong Bangladesh kiba poi ha ki shnong jong ki bad ba kim dei ban shu thombor kulmar pyrshah ïa ki khlem da tip ne ithuh ba ki dei kiei.
Na ka liang ki bor pulit ki la pynkhlaiñ ïa ki bor pahara ha ki jaka sangeh kali ne rel bapher bapher kiba don ha kylleng ki jaka khnang ban pyntikna ba kin ym don kiba kum kine ki briew ki ban shah thombor.
