Hyderabad, Nailar:
Ki pulit jong ka Warangal Commissionerate ki la lah ban pynpulom ïa lai haduh san tylli ki kam leh thok ïa u khaw Public Distribution Scheme (PDS) haman ka taïew. Dang shen kumba la sakhi, la ong ba kane ka kynhun ka la ïoh ban kurup ïa 600 kwintal u khaw PDS uba la kot sha ka dor kaba `. 15.60 lak.
Ha kine ki khyndiat sngi ba la leit, ki pulit ki la ïoh ban kem ïa uwei u briew ba la tip kyrteng kum u A Dayakar (45), uba long u trai jong ka Balaji Rice Mills ha ka shnong Venkatapuram, halor ka jingleh beaiñ jong u ban buh ïa u khaw PDS ha ka karkhana tylliat kba ha ka jaka kaba hap hapoh ka jingkhmih jong ki pulit ka Zaffargadh.
U Dayakar u la thied ïa u khaw na ki shnong ba marjan bad die ha ka dor kaba kham rem na ka bynta ka jingïohnong shimet.
Ïa u khaw ba la ïoh ban kurup bad ïa u Dayakar la aiti noh sha ki pulit jong ka Zaffargadh Police na ka bynta ban leh ïa kaba donkam.
Tang ha ki saw bnai ba la lah, la don shibun u khaw PDS ba la ïoh ban kurup ha ki jaka kiba hap hapoh ka jingkhmih jong ki pulit ka Warangal Police Commissionerate. Wat lad ki la don ki jingïoh kurup kiba shisien shi taïew, ka jingdie tuh ïa une u khaw ka la nang ïai bteng da ki nongsam khaw rashon ha kaba ki la die sha kiwei pat ki jylla.
Kum ka jingshim kabu na ka jinglehsting jong ki bor ba dei khmih, ki nongsam khaw rashon beit beit ki la die ïa u khaw PDS sha ki nongtylliat kba bad shalan ïa u sha kiwei pat ki jylla.
Kane ka kynhun pulit na ka por sha ka por ka ju pynlong ïa ka jingkhmih bniah ïa ki kali ha ki thaiñ ba hap hapoh ka jingkhmih jong ki pulit ka Warangal ha kaba ki ju ïoh ban kurup ïa u khaw bad ki kali ba la pyndonkam beaiñ.
Wat lada katne ka jingpyntreikam pyrkhing ka la don, ki nongsam khaw rashon kim shym salia ne pynduh ha ka ban leh ïa kine ki jait kam ha kaba ki la die beaiñ ïa u khaw PDS.
Katkum ka jiungkheiñ ba la ïoh da ki lad phah khubor, la ong ba naduh u Kyllalyngkot haduh u bnai Naitung jong une u snem, ki pulit jong ka Warangal Police Commissionerate ki la ïoh ban kurup da kumba 4,169 kwaintal u khaw PDS uba la kot sha ka `. 1.02 klur, ha kaba la buh jingmudui ha ki 62 tylli ki mukotduma, bad ki la ïoh ban kem ïa 77 ngut ki briew kiba la leh ïa ka kam beaiñ.
