Shillong Nailar 19
U MLA ka Umsning u Dr Celestine Lyngdoh u la ong ba ma u bad ki ar ngut ki para MLA ki la khot lang ïa u MLA ka Congress na Mylliem konstitwensi u Bah Ronnie V Lyngdoh tangba u khlem don ka jingkwah ban ïaid lang kumjuh.
“Ngi la khot lang tangba haba kam don ka jingkwah, ka shu kut noh hangta,” la ong u Dr Celestine haba kylli halor ka jingshah ieh marwei u Bah Ronnie.
U la ong ba ka jingrai ban rung sha ka NPP ka dei ruh kaba la ïakren lang da baroh lai ngut na ka bynta ban donbynta lang ha ka roi ka kiew jong ka konstitwensi bad kiwei kiwei.
U Dr Celestine u la ong ba ka jingleit ïasoh bad ka NPP kam dei ka jingkwah shuki hynrei ka dei na ka bynta ban kiew ka konstitwensi ha ka roi ka kiew.
U la ong ba ka jingrung sha ka NPP kan nym ktah wat haba ka Congress ka la sospon 6 bnai ïa u Bah Gabriel Wahlang bad Bah Charles Marngar namarba ka jingthoh kaba la phah da ki lai ngut ki MLA sha u Lamphang ka Ïingdorbar Thawaiñ ka Jylla ka la leit kham hashwa, kata ha ka 14 tarik Nailar. Shuh shuh u la ong ba ki paidbah kin kynthoh beit ïa ka jingleit ïasoh NPP hynrei ym lah lait na ki jingkynthoh bad kin kynthoh ba la ïoh da ki phew klur wat lada kyrduh ha la ïing la sem.
