Shillong, Nailar 20
U nongaiktien ka Voice of the People Party (VPP), Dr. Batskhem Myrboh ha ka Sngi Ba-ar u la ong ba ki nongmihkhmat kiba la mih na ka liang pyrshah ban leit pynïasoh pat sha ka Sorkar ki la thok la shukor bad pynbiej ïa u paidbah ba bun balang.
“Kine kiba ong ba ngi kwah ban shakri na bynta u paidbah hynrei kiba phet na ka liang pyrshah ban leit pynkhlaiñ ïa ka Sorkar…kita ki dei ki nongjler, ki thok ki shukor bad ki pynbiej ïa u paidbah,” ong u Dr. Myrboh haba kren halor ka jingkylla ka jinglong-jingman ka saiñ pyrthei hapoh ka Jylla.
U la ong ruh ba ka bynta jong ki ha ka liang pyrshah ka long kaba kongsan ban pynlong ïa ka Sorkar ba kan trei bad lada ym don liang pyrshah shuh, ka mut ka Sorkar ka lah ban leh katba mon.
“Kine kiba ong ba nga kwah ban shakri ïa ki paidbah da kaba leit ban pynkhlaiñ ïa ka Sorkar, kata baroh ka dei ka jingthok, jingshukor – kam dei kaba ki da thmu shisha ban ai ka jingshakri ïa ki paidbah,” u la ong da kaba ban jur halor ka jingdonkam jong ka liang pyrshah kaba khlaiñ, watla hapdeng ka jingpyrshang ka Sorkar ban pyntlot ïa ka liang pyrshah.
Halor ka jingleit pynïasoh NPP jong ki 3 ngut ki MLA Congress (Dr. Celestine Lyngdoh-Umsning, Bah Charles Marngar-Mawhati bad Bah Gabriel Wahlang-Nongstoiñ), u nongaiktien ka VPP u la ong ba kane ka ju jia ha ka saiñ pyrthei ha ka Jylla bad ha kiwei ki bynta jong ka ri kumjuh.
“Haba phi peit ïa ka saiñ pyrthei hangne, kam dei ka saiñ pyrthei kaba ki ai ka jingshakri ïa ka ri, ka dei beit ka saiñ pyrthei kaba ki kwah ban ïoh ïa ka bor. Ka dei kata ka jingthrang jong ki ba ki leit sha ka saiñ pyrthei. Na kata ka daw, ha kum kane ka saiñ pyrthei, kim lah ban don shabar jong ka bor,” u la ong.
U Dr. Myrboh u la ong ruh ba haba phai sha ka saiñ pyrthei hapoh ka Jylla, la ïohi ba ki ’riew saiñ pyrthei ki kwah pynïasoh sha ka saiñ pyrthei na bynta ban pynïoh jingmyntoi ïalade bad ki nongbud jong ki namar haba don ha ka bor, lah ïoh ïa ki jingdon-jingem.
Haba kynthoh ba ka jingsynshar ka Sorkar kam ïaid katkum ka Riti Synshar paidbah, u la ong, “Haba phi-phi long ka Sorkar, ka mut phi dei ka Sorkar jong ka Jylla bad ym jong ki konstitwensi kiba phi-phi mihkhmat namar naduh u Myntri Rangbah haduh ki Myntri, ki dei jong ka Jylla.”
Haba kdew ba ka saiñ pyrthei ka la hiar dor, u Dr. Myrboh u la ong ba kito kiba don ha ka bor kim sngewthuh shuh ïa ka kamram jong ki katkum ka Riti Synshar ka ri.
“Ki shim ïa ka saiñ pyrthei tang ban pynïaid, ban pyndonkam bakla ïa ki jingdon-jingem jong ka ri, ka Jylla ban pynmyntoi ïa kiba don ha ka bor bad kiba ha syndah jong ki,” u la ong da kaba bynrap ba kito kiba don ha ka bor ki ïaleh kumno ban pynïaid ïa ka roi ka kiew tang ha ki katto-katne bynta ba ïadei bad ka Sorkar.
Shuh shuh u la bynrap, “Ha ka synshar paidbah, haba phi la jied ïa ka Sorkar, ka mut ka dei ka Sorkar jong baroh, kim peit shuh uno u liang pyrshah, uno u liang synshar, phin hap synshar beit na bynta ka Jylla…bad kane ka la hiar dor. Ka jinglong jong ka Sorkar ban ym ai eiei ïa kito ki konstitwensi ba don ha ka liang pyrshah…kane ngi lah ban ong ba ka long pyrshah ïa ka jingsynshar paidbah bad wat ïa ka Riti Synshar ka Ri.”
