Shillong, Nailar 21
Ka Employment Monitoring Cell jong ka Khasi Students’ Unïon (KSU) ka la leit ban buh da ka dorkhas hakhmat u Myntri Rangbah jong ka jylla u Conrad K Sangma halor ban wanrah ïa ka jingkylla ïa ka rukom treikam jong ka MPSC kaba la jyrsieh ha ka rukom thungkam thungjam.
Ha kane ka dorkhas ba la aiti sha u Myntri Rangbah, ka KSU ka la buh ïa ki 20 tylli ki mat jingdawa ban saiñdur bad pynbha ïa ka rukom treikam ha ka Meghalaya Public Service Commission. Ha ka kyrwoh khubor ba la pyllait da u Chairman ka Employment Monitoring Cell ka KSU u Reuben Najiar u la ong, ïa kane ka dorkhas, ka seng lashai ka sngi kan sa leit sha baroh ki seng saiñpyrthei (political parties) jong ka jylla bad ki 59 ngut ki MLA khnang ba kin dup lah ban ïathir ïamir halor kine ki mat jong ka MPSC ha ka ïingdorbar ka ban sa long shen.
Ha kane ka dorkhas, ka KSU ka la ong ba ka MPSC ha kine ki phew snem kiba la leit, ka la don ha ka tang ki jingshah kynthoh ki jingkulmar halor ka jinglong bad leh shiliang, bamsap bad bun kiei kiei bad ba kine ki jingkynnoh pyrshah ïa ka Commission watla ki long shisha hynrei ym lah pat ban wanrah shabar namar ba kam don ka rukom kaba bïang ban peit ïa kine ki kynrum kynram.
Ka KSU ka la ong ruh ba palat 50 tylli ki snem ki la ïaid naduh ba la thaw ïa ka Commission hynrei kam shym la don ka jingkylla lane ban pynkylla ïa ka 1972 Regulations ka ban peit ïa ki jingdonkam halor kane ka mynta bad ruh ba kam don ki kyndon thungkam lane ki kyndon eksamin ban wanrah ïa ka jingbeit ryntih ha ka rukom thungkam kaba beit bad khlem shah lïang. Ki 20 tylli ki mat jingdawa ba la buh da ka KSU ki long ba dei ban thung da u Chairman bad ki dkhot kiba tbit jong ka Commission ki bym don jingïadei bad ki seng saiñ pyrthei. Ban pynbna ïa ka jingdon jingem da u shakri sorkar kiba kynthup ïa u Chairman, ki dkhot bad baroh kiba trei hapoh ka Commission. Ban thaw ïa ka Vigilance and Anti-Corruption Directorate. Ki nongthep kam ki dei ban dei ki nong Meghalaya bad kiba dei ban nang ka ktien Khasi lane Garo na ka bynta kino kino ki kam kiba lah ban thep kam ha MPSC.
Ban don ka Combined Competitive Examination na ka bynta ki kam, kaban dei kajuh ka jingsiew bad ka kyrdan. Ïa ka eksam MCS bad MPS bad kiwei ki kam dei ban pynlong manla u snem. Dei ban pyllait ka almanac jong ki tarik eksamin da ka Commission. Ban pynbna paidbah ïa ki mark jong ki kyrtong ba ïakhun ïa kino kino ki eksam, ki test ne ki personal interview na ka bynta kino kino ki post ba pynlong da ka Commission. Ym dei ban pynkylla ïa ki Roll Number jong ki kyrtong hapdeng jong ka jingïaid ka kam. Ym dei ruh ban don ki jingkylla shisien ba ka kam thungkam ka la ïaid. Dei ban sam ruh ïa ki Carbon copy jong ki MOR sheet sha ki kyrtong ba ïakhun eksam. Ban pynduh noh ïa ka personal interview na ka bynta ka Grade B, C bad D. Ban pynlong ïa ka personal interview jong ki Grade A hapoh ka jingpeit ki kor camera nalor kiwei kiwei pat ki mat bad jingai jingmut ba la bsuh lang hapoh ka dorkhas.
