Bertina Lyngdoh
Ka kynthei briew ka long kawei na ki jingthaw u Blei kaba hiar pateng na ka Im ïa kaba la saiñdur da u Kynrad. Ka kynthei ka long ka kmie met kmie mynsiem ïala ka jong ka ïing ka sem kumjuh ruh ïa kiwei pat ki para mynsiem. Ka don ruh ïaka jingkitkhlieh ba kyrpang khamtam haba ka shim ïaka jinglong kmie. Shisien ba kala shim ïa kane ka jinglong rangbah, ka pyrkhat ka khuslai kumno ban long bha man bha kata ha baroh ki liang. La ka don tang shibor, hynrei ka don bun ki buit ban pyndap pynbiang ïa ka iing ka sem. Kumta, ym i bit keiñ ban kheiñ poh ne kheiñ beiñ ïa ka bor ki kynthei khamtam ïaka kamai jong ki. La ha ka bormet, hynrei ha ka buitstad ka shlur ban kamai tang ban im maka bad ki khun.
Haba la long kmie, khlem pep ki khun ha sangkti hap ban pynim. Ka lah ban long ka kynthei kaba biej ba them lane ba duna ha ka jingnang jingstad, hynrei ha ka kamai ka long kaba stad bad shemphang bha. Ban im lade bad la ki khun, ka tur khlem salia ban shah ïaka lyer, ka sngi, u slap. Kam ju don ruh ka mynsiem sngewpoh, watla ka trei ïaka kam kaba poh tam. Kam ju pynsngap ruh ïa kaei kaba ka imlang sahlang ka kren ïaka. Watla ka don hapdeng ka jingbym koit bym khiah, katba ka dang lah hi ban kyrda ka khie ban leit bylla namar ba dawa ka kpoh.Baroh ki kmie ki sngewshngain haba dang don u kpa, ynda u pat ym don shuh, ka kmie kala hap ban trei dohiap dohim. Lehse, ka lah ban long ba ka kamai ka kynthei lane ka kmie kam da kotbor kum u rangbah hynrei la katta ruh ka lah ban pyllait na ka iapthngan. Nalor kane, ka kamai jong ka, watla ka long ka barit, hynrei ha ki khun ka long kaba khraw. Katta nang bun ki jingdawa, katta ruh ka kmie ka nang trei shitom. Haba ki khun ki dang hap song tiphin, naba ban ioh ïaka jingnang jingstad ba pura ki jingpyrkhat ka kmie kim ju kut.
Te namarkata, kum ki khun, tyngkai lem ïaka kamai shibuit shibor. Kum ki khun, donkam khamtam eh ban im bha ban long ka nongkylliang ba bha ïaka kmie. Duwai ruh i’u Blei khamtam ïaka koit ka khiah jong ka. Ban im slem ka kmie, long ka jingkyrkhu ïaki khun. Haba shitom ka kmie, sangsot ki khun. Kumta, burom la kmie, bad kyrmen barabor ban ioh ki kmie baieit bad thehlut la ki khun.
