U Nongsaiñ Hima, 2022
Ka dei ka kamram jong ki nongshong shnong ban buh jingkylli ïa ki nongïalam kiba la shah jied ha ki paidbah bad ka dei ka kamram jong ki nongïalam ban jubab da kaba shai. Ha ka synshar paidbah, ki nongïalam kim lah ban kynran dien na ka jingai jubab. Hynrei ki don pat ki nongïalam ha kane ka juk kaba mynta, kiba sngew ba ki long halor ïa baroh bad kim sngewdonkam ban jubab eiei ïano-ïano. Ka jingsarong ka la kiew shaduh sha shynrong khlieh ha kiba kum kita ki nongïalam. Ki her na suiñ, bad kim treh shuh tang ban ïaid na sla khyndew. Hynrei kata ka jingher na suiñ ruh ka dei da ka pisa jong ki paidbah bad ym ba ki hap ban siew na la ka jong ka pla kynsit. Ynda ki la shah ktik naba smiej ha ki paidbah, ki sdang sa ka phet ïam rem bad kynnoh kylla laiphew jait laiphew skit. Don ki nongïalam kiba tang shu shah kylli jingkylli, ki la phoi noh namar ki shim ba ka kam ba ki leh ka dei ka kam shimet bad ym ka kam paidbah. Don ki nongïalam ki bym nud ban wan hakhmat kiba shlan ban kylli ïa ki jingkylli kiba eh bad kiba kin jnang lada ki jubab ruh. Don ki nongïalam kiba kynnoh ba kiba kylli jingkylli kiba eh ki dei na ki seng saiñpyrthei kiba don sha ka liang pyrshah. Don ki nongïalam ki bym lah ban shah lada don kiba woh dong woh daw halor ki jingshisha. Don ki nongïalam kiba sngewhok bad sngewkhuid shaba palat ba tang ban ïakren ruh ym sngew long shuh. Don ki nongïalam kiba sngew ba kaei kaba leh ma ki ka long kaba dei lut bad kaba leh kiwei ka dei kaba bakla suda.
Hynrei, katta kin nang dom, katta dei ban ktik naba smiej. Katta ki nang bitar, katta dei ban pyndom da ki jingkylli kiba eh bad kiba kin jnang ban jubab. Don ki nongïalam kiba la sngew stad, sngew heh spah bad sngew khyllew shaba palat haduh ba pynlong ïa ki ban kren kat shaba lap ba shem khlem sngewthuh kaei ka jingkylli bad kaei ka jubab. Don pat kiba la shu lapmiet tang ban kren biria haduh ba la thait sa ban sngap namar ki la pynlong kamkai lut ïa ki kam ba shisha. Don pat kiba shu leit shad khleh biej kat shaba lap khlem tip shuh ban burom ïa la ka longrynïeng bad ka kyrdan kaba ki paidbah ki la pynkhamti ha ki. Ki sngewthuh eh ba ki shong ha kato ka shuki namar ka bor jong ki paidbah. Hynrei ki leh bym salia namar ki tip shai ba lada pynbiej biang ïa ki paidbah, kin sa biej beit bad kin nang wanphai sha ka bor.
Ngim dei than ban kynnoh ïa kita ki nongïalam ruh namar ka jingkynnoh kaba kham bun ka leit sha ki paidbah kiba jied ïa ki. Haba la bet da u symbai u bym da bha, ha ka por ba ot ruh, yn ïoh da u soh u bym bha. Ha kajuh ka rukom, haba ngi bakla ban jied ïa ki nongïalam, ngin ïoh da ki soh pyut suda bad ka jingbabe kan wan bud ryngkhi. Ka por ka la dei ban ïa pyrkhat sani bha bad ym ban shu ïa pynlong kam kai ïa ka jingsynshar paidbah. Jied da ka jingkitkhlieh bad ym da ka jingshongshit ne da ka jingshah pynbiej namar ynda la saja, baroh kin saja lang bad ym tang kita kiba la jied ïa kita ki nongïalam ki bym biang hangno-hangno ruh ban ïalam ïano-ïano ruh.
Ki paidbah kim dei shuh ban shah pynbiej ha ki nongpynbiej kiba nang tang ban leh biej bad ban kren khleh biej. Ki paidbah ki la dei ban stad hadien ba ki la mad la katto ïa ki jingeh kiba laiphew jait laiphew skit. Ngim donkam ban ïa batai than kiei kita ki jingeh namar baroh ngi la ïa shem ïa kajuh ka apot. Mynta ka la dei ka aïom ba ngin ktik naba smiej ïa kiba kum kita kiba kam ba ki dei ki nongïalam. Phi la dep ai ka burom bad ka iktiar ïa ki, hynrei ki khlem pyndep hok ïa la ka kamram namar ki la lapmiet ha ki kam ki bym don jingmyntoi ïa ki paidbah. Mynta ka la dei sa ka pali ban pyni sha ki ïa ka lynti ïaid sha ka jingkhang bah ban mih syndon sha phalor. Pynmih noh ïa ki na ka jinglong dkhot ka ïingdorbar thawaiñ. La biang ka jingleh drama. Pyndonkam hok ïa ka iktiar ban jied ïa ki nongïalam ki ban long shisha ki nongïalam bad ki ban ym die tad dor ïalade bad ïa ka jylla. Ktik naba smiej bad hangta phin sa ïohi ïa ka jingïapbiej jong ka jingsynshar paidbah.
