Shillong, Nailar 22
Ka khubor kaba la ïohlum ha ka Sngi Palei lyngba ka ‘website’ jong ki pulit ka jylla ka ïathuh ba lai ngut ki nongshong shnong ka East Jaiñtia Hills ki la shah shukor pisa ha uwei u bar jylla ha kine ki khyndiat bnai bad snem, bad haduh mynta, kim pat lap dien satia ïa uta u nongshukor ïa ki.
Ka jingujor banyngkong ka la wan na kawei ka nongshong shnong na East Jaiñtia Hills ha kaba ka la ong ba ha ka 14 tarik Nohprah, 2023, ka la phah pisa T. 7.3 lak sha uwei u briew ïa uba la tip kyrteng kum u Deepankar Barman, trai jong ka DB Stock Consultancy, GS Road, Ulubari (Guwahati) na ka bynta ban bei pisa ha ka ‘Stock Market’.
Hynrei ha ka jingujor, katei ka nongshong shnong ka la shem ba ka shlem treikam jong utei u briew ka la khang khyrdep, bad haduh mynta, ym lap dien shuh ïa uta u Deepankar Barman.
Shuh shuh ki pulit ki la ïoh pdiang ïa kawei pat ka jingujor kaba ïasyriem bad katei ka banyngkong ha kaba sa uwei pat u nongshong shnong na East Jaiñtia Hills u la ujor ba ha ka 18 tarik Nailar, 2022, u la phah pisa T. 60,000 sha utei ujuh u briew ban bei tyngka ha ka ‘Stock Market’. Hynrei une ruh u la ngat ha kajuh ka apot.
Nalorkata, sa kawei pat ka jingujor na uwei pat u nongshong shnong ka East Jaiñtia Hills ka la don ha kaba une u la phah pisa T. 2 lak ha ka 15 tarik Nohprah, 2023 sha u Deepankar Barman na ka bynta ban bei pisa ha ka ‘Stock Market’. Hynrei ynda la hadien, la shem ba ka shlem treikam jong u ha Guwahati ka la khang khyrdep bad haduh mynta, ym tip shano une u Deepankar u don.
