Kinshasa, Nailar:
Katkum ka kaiphod ba la ioh jingkheiñ thymmai, la shem ba ka jingdon kiba shah ktah ha ka jingpang khlam Mpox lane ka Monkeypox hapoh Democratic Republic of Congo (DRC) ka la kiew bha, katba katei ka ri Africa ka dang ap ia ki dawai tika na ka United States bad ka Japan, ban ioh ban tehlakam noh ia ka jingpur stet bad ka jingjur jong katei ka jingpang khlam ha katei ka ri.
Kumta, la ong ba ka jingdon kiba shah ktah ha katei ka jingpang na katei ka ri ka la kiew na ka 16,000 tylli ki case ba la ioh jingkheiñ ha kine ki khyndiat sngi ba la leit, sha ka 16,700 tam ha ka Sngi Nyngkong, ha kaba ka jingkhlad jong kiba ioh ia katei ka jingpang pat ka la kiew sha ka 548 ngut baroh.
Kumta ki bor pyniaid katei ka ri ki la kyntu ia ka US bad Japan ban pynkloi noh ia ka jingphah ia kitei ki dawai tika khnang ban lah ban tehlakam noh ia katei ka jingpang shwa ba kan pur bad bam duh ia ka ri baroh kawei.
Hynrei la ong ba kane ka jingpang khlam ka la jur bha ha ki bynta jong ka United States ruh naduh ba mih une u snem 2024, ha kaba ki heh ka World Health Organization (WHO) ki la maham ia ka ingma kaba lah ban ktah ia ka pyrthei baroh kawei na ka jingjur jong katei ka khlam Monkeypox, kaba kham ñiar eh ruh ban pur sha ki briew, lait noh tang ha kito kiba shongkha para shynrang.
