Beirut, Lber:
Ki shipai jong ka Israel ki la ther sa ïa ki katto- katne ki bynta jong ka Lebanon, kynthup ïa ka nongbah Beirut, da ka jingthmu ban thombor ïa ki ktem shipai jong ka Lebanon. Ia kane la pyntikna da katei hi ka kynhun lehnoh Hezbollah kaba ju ioh jingkyrshan ratbah na ka Iran baroh shi katta, hadien ba ka Israel ka la ioh ban pynliem noh ïa u nongïalam ba haklhieh duh jong ka Iran- u Ali Khamenei.
Ki shipai Israel ki la ong ba “kum ka jingkynthoh halor ka jingsiat bom jong ka Hezbollah “ki shipai Israel “ki la sdang ban siat ïa ki thong jong ka kynhun lehnoh Hezbollah ha kylleng ka Lebanon”.
Ka kynhun lehnoh jong ka Lebanon, ka Hezbollah, ka la shim ïa ka jingkitkhlieh halor kane ka jingthombor, da kaba ong ba ka la siat ïa ki roket bad ki drone “kum ka jingpynhiar kput ïa ka snam ba khuid jong u… Ayatollah Imam Sayyid Ali al-Husseini Khamenei… bad ban ïada ïa ka Lebanon bad ki briew jong ka, bad kum ka jubab ïa ki jingthombor ba man ka por jong ki Israel”.
Kane ka dei ka jinghiar thma kaba nyngkong ba ka Hezbollah ka la kam ia ka Israel hadien ba u Naiwieng 2024 ka jingiateh sangeh iasiat kaba thmu ban pynkut noh ïa ka jingïaleh thma kaba la neh shisnem hapdeng kine ki arliang mamla. Naduh katei ka por ka Israel ka la pynlong ïa ki jinghiar thma man ka por ïa ka Lebanon, kaba ka ju ong ba ka dei kaba la thombor ïa katei ka kynhun lehnoh. Ka National News Agency (NNA) jong ka Lebanon, kaba la pyniaid da ka sorkar, ka ïathuh ïa ka jinghiar thma jong ki Israel, ha kylleng ka Lebanon, kaba sdang na ki jaka ba shathie jong ka Beirut, ha kaba ka Hezbollah, ka bat ïa ka bor.
Ka NNA ka la pyntip ruh ïa ka “jingpynkynriah jaka kaba jur” na ki jaka ba shathie jong ka Beirut bad shathie jong ka ri katba ki nongshong shnong ki dang pyrshang ban phet krad na ki jaka.
Ka tnat shipai jong ka Israel, ha ka kyrwoh kaba kham hadien, ka la pynthikna ba ka la thombor ïa ki ehrang Hezbollah ha ki thaiñ Beirut bad ïa uwei u lehnoh ha ka thaiñ shatei jong ka Lebanon.
U Myntri Rangbah duh jong ka Lebanon, u Nawaf Salam, u ong ba ki jingthombor ïa ka Israel, ki long ki bym don jingkitkhlieh bad kiba suba.
Khlem da jer kyrteng ïa ka Hezbollah, u Salam u la ong ba ka sorkar jong u kan “shim ïa baroh ki lad ki lynti ban khanglad ïa ki nongleh kam sniew bad ban ïada ïa ki paidbah Lebanon.”
Ki bor synshar jong ka Lebanon, ki la pynpaw bunsien ba kim kwah ban pynïasoh ïa ka ri jong ki, ha ka jingkhie ka jingïakynad ha katei ka thaiñ, kaba la sdang hadien ka jinghiar thma jong ka US bad Israel ïa ka Iran.
Kata ka la pynlong ïa ka jingwan thombor jong ki namding bad ki drone na ka ri Islam ïa ki ri Israel bad ki ri Gulf kiba don ïa ki ktem jong ka US.
