Shillong, Nailar 22
Watla u Figo Syndai, u rangïalehkai ba sha ‘wing’ jong ka Shillong Lajong FC, u la ïoh mih madan ha ka minit kaba 50, hynrei dei ka jingtbit jong u ban kynjat ba ka bol ka la rung beit sha ka kol jong ka East Bengal ha ka minit kaba 84 shwa ban wai ka jingïalehkai kaba la buh 90 minit.
Kane ka jingïoh thep kol kaba ar jong u Figo ka la pynlong ïa ki paidbah ban shadkmen haduh ban da wai namar ka Shillong Lajong ka la jop ïa ka East Bengal kaba dei ka kynhun kaba ïalehkai ha Indian Super League da ar kol la kawei ha ka jingïalehkai Quarter Final ha Jawaharlal Nehru Stadium, Shillong ha ka Sngi Balang.
U Figo u dei u rangïalehkai uba dang 23 snem ka rta u dei shnong trai na Syndai kaba hap ha Amlarem Block, West Jaiñtia Hills uba la sdang ban ïalehkai I-League bad ka Shillong Lajong ha u snem 2023.
Ban tip kham bniah kumno u Figo u la ïoh ban thep ïa ka kol kaba ar ha ka jingïalehkai bad ka East Bengal, U Nongsaiñ Hima u la ïoh ban leit ïakynduh kyrpang bad u ha ka jaka sah ha Shillong.
U Figo u la ïathuh ba u la ïoh ban ïalehkai phutbol ha madan ha Syndai hynrei u la ïoh ïa ka lad ban paw hadien ba u leit pyrshang bad ka Langsning FC haba ka la wan ban wad ïa ki khynnah kiba don sap ha Jowai.
U la ïathuh ki don saw ngut ki rangïalehkai na War Jaiñtia kiba don ha Shillong Lajong kata u Phrangki, Safeme bad Shano.
U la kyntu ïa ki heprit bad ki samla ba lada ki kwah ban long u rangïalehkai uba biang, donkam ka jingkohnguh sneng ïa ki nongpynïaid bad ban trei shitom ruh.
Haba phai sha kane ka jingïalehkai ba la long hynnin ka sngi, ka la pynkyndeh mynsiem ïa ki nongkyrshan ka Shillong Lajong namar mar shu sdang ka jingïalehkai kata ha ka por 7 minit 44 second u rangïalehkai na Lajong u Rudwere u la ïoh ban thep ïa ka kol kaba nyngkong.
Ha ka kyllamiet ka East Bengal ka la ïoh ban pynphai ïa ka kol ha ka por 76 minit ba la thep da u Nandha. Kaba la pynkmen ïa ki paidbah ka dei hashwa ba u Referee un pynwai noh ïa ka jingïalehkai ka Shillong Lajong ka la ïoh ban pynphai da kaba thep kol ha ka minit kaba 84 da u Figo.
Ha kane ka jingïalehkai la ïohi ba ki paidbah kiba wan na nongkyndong ki bun kiba la leitphai thylli namar ka jingbym don tiket shuh naduh dangstep namar ba la bun kiba la dep thied lut na Online.
Na ka bynta ka jingïalehkai Semi Final ki paidbah ka jylla kin sa ïohi biang da la ki jong ki khmat ha Jawaharlal Nehru Stadium namar ki bor pynïaid ki la rai ban pynlong ha kane ka madan ha ka 26 tarik Nailar ha ka por 5:30 janmiet ha kaba ka Shillong Lajong FC kan ïakhun pyrshah ïa ka North East United FC kaba dei ka team Indian Super League.
