Shillong, Nailar 22
Ki shipai Border Security Force (BSF) ki la ïoh ban kurup noh ïa ki jingdih pynbuaid na kawei ka kali Bolero Pick-up ha ka por kaba ki la pynlong ka jingtalasi ha ka thaiñ Pongtung, kaba hap ha Pynursla Civil Sub Division.
Katkum ka kyrwoh khubor, la ong ba hadien ba la ishan khmat, ki BSF ki la ïoh bat ïa katei ka kali Bolero Pickup kaba don ïa u nombor ML05-AC-3601 ha shnong Pongtung bad haba la talasi ïa kane ka kali, la shem ba ka kit ïa ki jingdih pynbuaid.
Ki shipai BSF kila kem noh ïa ki ar ngut ki nong India kiba don ha katei ka kali, kaba mut ban rung sha Bangladesh katba ki dang poi ha shnong Pongtung ha East Khasi Hills.
Ki BSF kila ong ba kine ki briew kiba la shah kem ki dei na ka shnong Khanduli kaba hap ha West Jaiñtia Hills bad ha kane ka kali, ki la rah ïa kitei ki jingdih pynbuaid kiba la shongdor haduh T.70,11,960, ïa kiba la thmu ban phah sha Bangladesh.
Ki shipai BSF hadien ba kila pyndep ïa ki jingdonkam katkum ka aiñ, la aiti noh ïa kine kiba la kem sha ka tnat Customs kaba don ha Pynursla ban leh ïa kaba donkam katkum ka aiñ.
