Chicago, Nailar:
U President ka US- u Joe Biden, ha ka jingiakren bad u Myntri Rangbahduh ka Israel- u Benjamin Netanyahu ha ka Sngi Balang, u la kyntu ia ka Israel ba ka dei ban pyn-urlong ia ka jingiakren sangeh thma bad ka Hamas bad ban ialeh ban wanrah ia ka bha- ka miat bad ka shongsuk- shongsaiñ ha ka pyrthei namar ka thma Israel kam shym buh jingma tang ia ka Israel marwei, hynrei ka la buh jingma ia ka Middle East bad kumjuh ruh ia ka pyrthei baroh kawei.
Ha katei ka sngi, la iadon ryngkat ruh da ka Vice- President jong ka US- ka Kamala Harris, ban iakren- iapynbeit halor ki lad- ki lynti ban pyn urlong ia ka jingiakren sangeh thma bad ban iasuk noh bad ka Hamas, khnang ban lah ban tehlakam ia ki jingma kiba khraw kiba ap ia ka Israel bad ia ki ri ka thaiñ Middle East baroh.
Kumta, ha katei ka jingialang, la ong ba ka US ka la ban jur ia ka Israel ba ka dei ban ialeh katba lah ban pynrit ialade bad ban shu iabeit noh da kaba pdiang ia ki jingdawa jong ka Hamas ruh kumjuh, khnang ba ka Israel ruh kan ioh noh ia kito kiba la shah rahbor ha ka Hamas baroh bad ban poi sha ka lad jingiasuk ban lah ban pynsangeh noh ia ka thma katba ka por ka dang biang.
