Srinagar, Nailar:
U nongïalam ka liang pyrshah ha Lok Sabha u Rahul Gandhi bad u President jong ka seng Congress u Mallikarjun Kharge ki la leit sha Srinagar ha ka sngi Balang ha ka jingleit jngoh kaba ar sngi sha Jammu bad Kashmir ban khmih bniah halor ka jingpynkhreh jong ka seng na ka bynta ka ilekshon Assembly ka ban sa wan ha Union Territory bad ka la paw bad khmih lynti ba kan don ka jingïatreilang bad ka seng National Conference.
Kine ki nongïalam ki la shah pdiang sngewbha ha ka por ba ki la poi ha ka nongbah ha kaba ki nongkyrshan bad ki nongïalam jong ka seng ki la ap lypa shabar ka kad liengsuiñ.
Haba u la poi ha kane ka jaka, ki nongbud jong ka seng ki la pynsangeh wat ïa ka kali jong u Gandhi ha ka surok kali hapoh kad liengsuiñ, ha kaba kane shipor ka la buh jingeh ïa ki nongbud bad nongsynran jong u.
Kine ki arngut ki nongïalam ki leit jngoh ïa ka UT na ka bynta ka jingthmu ban pynlong ïa ki jingïalang ba kongsan ha kaba ïadei bad ka ilekshon Assembly kaba lai bynta ka ban sdang ha ka 18 tarik u Nailur, la ïathuh u heh nongïalam jong ka seng Congress.
