Shillong, Nailar 22
U samla Redeem Tlang uba dei na ka jylla Meghalaya uba ïalehkai mynta na Northeast United FC u la pynpaw ïaka jingsngewkmen haba ki kynhun ïalehkai na ka thaiñShatei Lam-Mihngi, kata, ka North East United bad Shillong Lajong FC ki la poi sha ka Semi Final ha ka jingïalehkai Durand Cup 2024.
U Redeem u dei tang ma u marwei u rangïalehkai na ka jaitbynriew Khasi uba don mynta ha ka North East United kaba dei ka team kaba don ha ka Indian Super League kaban sa ïakhun pyrshah ïa ka Shillong Lajong FC kaba dei ka team I-League ha ka 26 tarik Nailar ha ka por 5:30 janmiet ha madan Jawaharlal Nehru Stadium, Shillong.
Haba ïoh ban ïakren bad u samla Redeem lyngba ka ‘phone’, u la pynpaw ba watla ki nongkyrshan kin bun ïa ka Shillong Lajong FC ha ka jingïalehkai Semi Final, hynrei kum ki rangïalehkai kim dei ban sngap ïa ka jingbun briew kiba peitkai hynrei ka jingjop ne ka jingrem ka dei beit ban ïalehkai bha ha madan.
“Ngam tip la ngan ïoh ban mih naduh basdang ne ngam ïoh h namar baroh ka shong ha ki nongpynïaid jong ka Northeast United,” u la ong.
U la pynpaw ba baroh ki rangïalehkai ki kwah ban poi sha ka Final bad baroh ki kwah ban ïoh rah beit ïa ka jingjop.
