Chennai, Nailar:
U khlur ak phlim Tamil ba pawnam u Vijay ha ka sngi Palei u la pyllait paidbah ïa ka lama bad ka shap jong ka seng saiñ pyrthei jong u ka Tamizhaga Vetri Kazhagam.
U Vijay un pynher ïa ka lama ha ka shlem treikam jong ka seng ha Panaiyur bad un pyllait ruh ïa ka jingrwai na ka bynta ka seng saiñ pyrthei.
Ka lama kaba don ar rong kata ka rong saw jngum bad rong stem ka don ïa ka dur jong ki hati ha baroh arliang bad u klew ba la shah ker tawiar ha ki khlur hapdeng.
Ha u bnai Rymphang, u Vijay u la pynbna ba un sdang noh ïa ka Tamizhaga Vetri Kazhagam bad u la ong ba un ïakhun ïa ka ilekshon Assembly 2026 ha Tamil Nadu.
Ka seng jong u, kam shym la ïatreilang bad kano kano ka kynhun saiñ pyrthei ha ka ilekshon Lok Sabbha kaba la dep.
Ha ka por ba la don ka jingïalang, u Vijay u la ong, “Nga tip ba phi baroh phi ap ïa ka jingïalang jong ka jylla kaba nyngkong eh jong ngi. Ka jingpynkhreh ka dang ïaid shakhmat na ka bynta jong ka bad shen ngan sa pynbna ïa ka. Shwa kata, nga la pyllait paidbah ïa ka lama jong ka seng jong ngi mynta ka sngi. Nga sngew sarong shibun… Ngin ïatreilang na ka bynta ka roi ka par jong ka Tamil Nadu.”
Une u khlur ak phlim u la kular ruh ban trei na ka bynta ka bha ka miat jong ka Tamil Nadu bad ong, “Ka Tamil Nadu kan kham bha nangne shakhmat. La tikna ban ïoh ïa ka jingjop.”
Hadien ka jingpyllait ïa ka lama yn sa bud sa ka jingïalang paidbah kaba heh bha ha ka taïew ba khatduh jong u bnai Nailur ban pyllait paidbah ïa kane ka seng hakhmat ki paidbah ha Vikravandi ha ka thaiñ Shatei-lam-Mihngi jong ka Tamil Nadu.
Ka jingpynrung kyrteng ïa ka seng hapoh ka Election Commission ka dang shim por bad shen yn sa lah ban pyndep ïa ka. Kumba la ïathuh ka tyllong khubor la ong ba ïa ka jingrwai halor ka lama la thaw da u Music Director ba pawnam u S Thaman, katba ïa ki kyntien la thoh da u V Vivek.
Ki la don palat 300 ngut ki nongbud jong ka seng TVK bad kumjuh ruh ki dkhot nongkyrshan jong u Vijay kiba la shah khot sngewbha na ka bynta kane ka jinglehkmen.
