Kam pat ju kham jia ha ka saiñ hima sima bad jingsynshar jingkhadar ba u Myntri Rangbah jong kano-kano ka jylla un pynpaw beit pylleiñ ïa ka jingshun thlong mluh thlong sying ïa kano-kano ka shlem ai jinghikai. Hynrei naduh ki khyndiat taïew bad haduh ka 22 tarik Nailar, 2024, u Myntri Rangbah ka Assam, u Himanta Biswa Sarma, u la pynpaw pyrthei ïa ka jingshun jong u ïa ka University of Science and Technology, Meghalaya (USTM) kaba don hapoh u pud u sam jong ka Meghalaya, hynrei kaba markhap bad ka Assam. Kane ka jingshun jong u Himanta ka la sdang naduh ba ka sor Guwahati ka la mad ïa ka jingdap um ha kaba u la kynnoh ba kane baroh ka dei namar ka jingtih khyndew bad jingpynmadan jong ki lum da ka USTM ban pynïar ïa ka skulbah. U la sei ruh da ki dur ba la shon da ki bor ‘Satellite’ ban pynksan ïa kata ka jingkynnoh pyrshah ïa kane ka skulbah shimet (Private University).
Hynrei u Himanta u khlem sangeh tang hangtei. U la ong syndon ba ka USTM ka la leh da kata ka ‘Flood Jihad’ pyrshah ïa ka Guwahati. Ïa kane u la kren khnang namar u trai jong kane ka skulbah u dei u Muslim, bad ïa ka kyntien ‘Jihad’ la ju pynïasoh ne pyndonkam haba ïakren shaphang ki Muslim. Kane ka la nang pynhiar dor ïa ka kyrdan jong ka shuki Myntri Rangbah kaba dei ka shuki ba la pynkhamti da ka Riti Synshar jong ka Ri India. Kam long satia kaba bha ban wanrah ïa ka jingsngew ïapher niam ha man ki kam ki jam. Ka jingthmu jong u Himanta lehse ka long ban pharia ïa ki nongshong shnong ha ka kyrteng jong ka niam, bad ngi sngewlyngngoh ba na ka liang ki heh ka BJP kiba don ha Delhi kim nud ban mih shakhmat ban pynrem ïa kiba kum kine ki jait jingkren. Lehse ka BJP kam pat thngad na ka jingshah ai jingsneng ha ki paidbah ha ka ilekshon MP Lok Sabha ha kaba ka khlem lah ban ïoh palat 272 ngut ki MP tang marwei.
Nalorkata, hynnin ka sngi pat, u Himanta u la ai ksai ba ki samla pule kiba pyndep ïa ka kyrdan pule ‘graduate’ na ka skulbah USTM kaba don ha khappud ka Meghalaya bad Assam kin nym lah satia ban thep kam Sorkar ha Assam. U la ong ba kin don ki kyndon kiba pyrkhing bha na ka bynta ki samla pule kiba pyndep jingpule ba ki skulbah shimet kiba don shabar ka Jylla Assam. U Myntri Rangbah u la ong ruh ba ka tnat aiñ jong ka Sorkar Assam ka dang thaw ki lad kumno ban khang ïa kito kiba pyndep jingpule ba USTM ban ïoh kam sorkar ha Assam. Haba pyntieng ïa ki samla pule kiba na Assam bad kim dei ban leit pule ha USTM, u Sarma u la kyntu ïa ki ban shim ka lad ban ïoh pule ei ha Assam ha ka jaka ban pynlut pisa ban leit pule ha ka skulbah shimet kaba don ha Meghalaya. Ym tang katta, u Sarma u la kynnoh ba ka USTM ka pyrshang ban kheiñ hapoh ïa ki jaka pule kum ka Gauhati Medical College and Hospital (GMCH) da kaba tei la ka jong ka Medical College ha kaba ka la pyni ruh da kaba shu thok ba ki don ki nongpang ha ka por ba don ka jingjurip da ka National Medical Council.
Lehse hangne ngin sngewthuh balei u Himanta u shun ïa ka USTM. Ka USTM ka la ïaid shakhmat ban pyntreikam ïa ka Medical College bad lada ka treikam bha, khlem pep kan lah ban khring ïa ki nongpule, nonghikai bad kumjuh ruh ki nongpang. Kane ka skulbah ka dang pyntrei ïa ka ‘PA Sangma International Medical College And Hospital’ bad ki don ruh ki bynta kiba la dep. Namarkata, hapdeng ka jingtip ne ka jingbym tip, u Himanta u la dep ai ksai ba ka jingshun jong u ïa ka USTM ka dei namar kane ka Medical College bad Hospital. Balei kat u rangbah briew bad nalorkata, kat u Myntri Rangbah un pynpaw ïa kane ka mynsiem pihuiñ ïa kiwei? Ha ka jingshisha, kum u nongïalam u dei ban kmen haba kiwei ki jylla lane ki ‘riew shimet ki pyrshang ban trei bha na ka bynta ka jingmyntoi jong kiba bun. Ngim pat ju ïohi ïa uba kum une u nongïalam ne Myntri Rangbah uba kren ïa ki kyntien pharia jaitbynriew lane uba bishni ïa kiwei.
Ngi kyrmen pat ba ka USTM kan ym riej ne tieng na ki jingshah pyntieng kohtympan ha utei u Myntri Rangbah, bad kan bteng ïa ki kam kiba ka dei ban leh. Ha ka pyrthei baïar, ki samla kim peit tang ïa ka kam sorkar, hynrei kin leit wad bylla na kiwei pat ki shlem kiba sngewbiang ban pdiang ïa ki katkum ka kyrdan pule ne ka jingnang jingtip bad jingshemphang kaba ki don. Kata ka kam sorkar ha Assam ka lah ban don ne ym don, hynrei ki don da kiwei pat ki lad ki lynti ban kamai jakpoh bad ban trei. Ha ka jingshisha, kum u nongïalam u dei ban pynshlur bad ym ban pyntieng pynsmiej ïa ki samla bad ïa ki kmie ki kpa jong ki kiba la pynlut ban phah ïa la ki khun ba kin ïoh ïa ka jingnang jingtip. Hynrei ka long pat kaba sngewsih ba ha kum kane ka juk, ki dang don ki nongïalam kum u Himanta uba lapmiet ban pynïashrut para briew ha ka jaka ban ïatei lang ïa ka lawei jong ki samla, bad uba nud ban pyntieng bad byrthen ïa ki samla tang namar ba ki leit pule ha katei ka skulbah.
