Ka jingwan jong ka Durand Cup ha nongbah Shillong ka la pynlynguh haduh katta-katta ïa ki paidbah kiba ieid ïa ka jingïalehkai phutbol haduh ba mynta, ka sorkar jylla ka la hap ban pynbna ban pynïeng da ki Television kiba heh lane kita ki “Giant Screen” khnang ba kham bun na ki paidbah kin ïoh peit kai ïa ka ‘Semi-Final’ ka ban long ha ka 26 tarik Nailar hapdeng ka Shillong Lajong FC bad ka Northeast United FC ha ka por 5:30 janmiet. Ha kine ki sngi bad haduh ka 26 tarik Nailar, ki nongthied tiket ban ïoh rung sha madan Jawaharlal Nehru Stadium, Polo, kan jur bha. Ngi kyrmen ba kan ym mih ka kynrum kynram ha kine ki sngi bad ka jingïalehkai ha ka Lah Sngi U Blei kan long kaba ïaid beit.
Ka jingjop jong ka Shillong Lajong ha kine ki jingïalehkai kiba la dep bad khamtam ka jingjop ïa ka Emami East Bengal ha ka ‘Quarter-Final’ ka la nang pynshitrhem ïa ki ‘riew ieid phutbol ba kin leit peit kai sa ïa ka ‘Semi-Final’ ha ka 26 tarik Nailar. Ngi khlem poi pyrkhat ba ka Lajong, kaba ïakhun ha ka I-League, kan lah ban pynliem ïa ka kynhun kaba ïalehkai haduh ka kyrdan Indian Super League. Ngi hap ban ai burom ïa ki nongpynïaid bad ki nongïalehkai ka Lajong halor ka jingtbit jong ki. Ha ryngkat ka jingkyrshan bad jingai mynsiem ki paidbah, ka Lajong ka la nang ïoh bor bad ka khlem pynlehnohei ïa ka jingwan jong ki nongpeitkai naduh ki khyllung khynnah bad haduh ki rangbah bad longkmie. Da shisha, ka phutbol ka dei kata kaba ki ong ka ‘The Beautiful Game’ lane ‘O Jogo Bonito’ ha ka ktien Portuguese. Lyngba kane ka jingïalehkai, ngi ïohi ïa ka jingieid, jingïatylli, bad jingshitrhem kaba ngim lah pat ban ïohi ha kiwei ki jingïalehkai ne kiwei-kiwei ki rynsan.
Ka burom bad jingïaroh ka leit ruh sha ki nongpynïaid jong kane ka Durand Cup khamtam ba ki la mynjur ban pynlong lang ha Shillong nalor kiwei pat ki jaka ha ka thaiñ Mihngi jong ka Ri. Ka jingwan jong ka Durand Cup ym tang ba ka la lah ban pynbor ban pynbha ïa ka madan ïalehkai ha JN Stadium, hynrei ka la pyni ruh sha ka pyrthei katno ki paidbah hangne ki ieid ïa kane ka jingïalehkai. Lehse na kane ka lympung, kan pynpyrkhat wat ïa ki nongpynïaid ka ISL ban buh jaka lem ïa ka Shillong bad ki kynhun na kane ka jylla. Ngi lah ban ong ba kan ym long lehnohei lada pynlong ïa ki jingïalehkai ISL ha Shillong namar ki paidbah kin ïa mih beit ban leit peit kai. Ki paidbah ruh, lada pynïalehkai ïa ki jingïakhun ISL ha Shillong, kim dei ban pynlehnohei. Lada ym don sa ki paidbah kum ki nong Meghalaya kiba kyrshan bad ieid ïa ka phutbol, ngi sngewthuh ba kan jynjar ban pynïaid ïa kane ka jingïalehkai namar sha ri thor, ki kham duna kiba ieid bad kyrshan bad ka i long lehnohei ba ki don ïa ki ‘Stadium’ kiba heh. Ma ngi hangne, watla ka ‘Stadium’ ka kham rit, hynrei ki paidbah ki tur beit ban ai jingkyrshan ha ryngkat ka kynhoi ka risa bad ka jingrah ïa ka bom bad ki ksing.
Kane ka lympung ka dei ruh ban ai mynsiem ïa ka sorkar bad ïa kiwei ban nang pynbha ïa ki madan ïalehkai ha kylleng ka jylla, bad ban ïa wad shaduh sha nongkyndong ïa ki khynnah bad ki samla ba don sap ha ka phutbol bad ban pyntbit ïa ki ha ka rukom kaba dei. Ka phutbol kam dei shuh tang ka jingïalehkai myllen, hynrei ka dei ruh ka lad ban ai kam ai jam namar ngi ïohi ba ki khlur ïalehkai na kiwei pat ki Ri bad dewlynnong ki kamai ha ban da biang na kane. Ki samla jong ngi ruh ki dei ban ïoh lad lem ban shah pyntbit bad ban ïalehkai sha ki kyrdan ba kham shalor. Ban don tang ka sap kam pat biang satia, hap ban kilan met bad shah hikai ha ka rukom kaba dei khnang ba kato ka sap kan long kaba janai bad kaba lah ban pynim ïa ki nongïalehkai. Kam don jingmut ba ki samla jong ngi kin shu kut tang hangne. Kin hap ban leit ïatynjuh bor bad ïatynjuh sap bad kiwei ruh khnang ba kin sngewthuh ïa ki jingduna bad haei ki donkam ban pynkhlaiñ ïalade ba kin nang paw.
Ngi kyrmen ba hadien ka Durand Cup, ki jingkylla kin nang ïai wan ban pynjanai ïa ki khynnah bad samla na kane ka jylla ha ka jingïalehkai phutbol, bad ha kajuh ka por, kan don ka jingpynbha ïa ki madan ïalehkai bad ki ‘Stadium’ la ki dei ha ki jaka sor ne nongkyndong. Kam don jingmut lada kan shu kut noh ka jingshitrhem ynda la kut ka jingïalehkai. Ka mynsiem ban nang pynbha bad pynjanai ka dei ban don. Ban poi sha ki thong kiba kham heh, donkam pat ïa ka jingïatreilang jong baroh. Ban shu ieh tang ha ka sorkar marwei, ka kam kan ym poi shano-shano watla ka sorkar ka dei ka nongkyrshan ba radbah ha kine ki kam. Khlem ka jingïatreilang ha kino-kino ki kam, ngin ym lah ban ïoh ïa ki jingangnud. Hynrei haba don ka mynsiem bad ka jingmut ban ïatreilang, yn ym don ki jingeh kiba lah ban khang. Ban kyntiew ïa kano-kano ka long kaba eh haduh katta-katta, hynrei ban pynhiar ïa kaei-kaei, kam da shimpor than.
