Imphal, Nailar:
Kumba la sakhi, la ong ba ki bor pahara ha Manipur ki la pynlong ïa ki jingleit khynra bad ki jingwad bniah kiba jur bad ki jingpyntreikam ban khmih bniah ïa ki jaka kiba don ha ki jaka ba marjan bad ba shong shnong ki rit paid jong ki jaka lum bad them jong ki distrik ba bun.
Kine ki jingpyntreikam ki la pynlong ban ïoh ban kurup ïa kiba bun ki tiar ïaleh, ki tiar siat bad tiar pynbthei ha kaba kane ka la pynpaw ba ka jingïakhun ka dang ïai bteng ha ka thaiñ.
Ha ka thaiñ Tekcham Maning Ching kaba don ha Thoubal distrik, ki bor pahara ki la ïoh bad kurup ïa kiba bun ki tiar ïaleh bad ki tiar pynbthei kiba bun jait, kiba kynthup ïa kawei ka SGM Carbine, kawei ka pistol M20, ar tylli ki pistol 9mm, kawei ka suloi shi ktang, khyndai tylli ki bom kawang kti HE-36, uwei u Mortar Shell 81mm, ar tylli ki Green 80MK (WP), uwei u bom kawang pynsat khmat, 7 tylli ki tyndong kawang pynsat khmat, 35 tylli ki kuli bym pat pyndonkam, lai tylli ki kuli .303 ba la pyndonkam, lai tylli ki kuli 16mm ba pyndonkam ha ka ban aidak, kawei ka Baofeng Radio Set kaba don ka Charger, bad shiphew hajar tylli ki jingthoh jong ki Burmese.
Kumjuh ruh ha ka shnong Nungaipokpi kaba don ha Imphal East District, ki shipai ïada khappud ki la ïoh ban kurup ïa ar tylli ki pistol .32 ryngkat bad uwei u kuli, kawei ka suloi 12-bore, lai tylli ki bom kawang kti HE-36, hynriew tylli ki bom pynbthei dieng, 15 tylli ki kuli ba la pyndonkam, lai tylli ki bom pynbthei, uwei u bom 2″ Para Illuminating Bomb, san tylli ki kuli bym pat pyndonkam, lai tylli ki khadu, lai tylli ki bom pynsat khmat, saw tylli ki bom WP Green No .80 MK1, bad lai tylli ki bom ba ju pyndonkam ban pyrshah lada don kiba siat da ki Shell. Shuh shuh nalor kane ka jingïoh kurup, ki bor pahara ki la pynthikna ruh ban ym don jingthut ha kaba ïadei bad ka jingïaid jong ki 120 tylli ki kali ha shi lynter jong ka surok NH-37 bad jong 76 tylli kiba ïaid ha ka surok NH-2, kiba ju kit ïa ki tiar ba ju pyndonkam man ka sngi.
Kum shi bynta ban pyntikna ha ka ban pynneh-pynsah ïa ka shongsuk-shongshngaiñ ha ka thaiñ, ki la don haduh 105 tylli ki jaka pynap shrip ba la buh bad pynap ha kylleng ki distrik, ha kaba da kane ka jingpyntreikam la ïoh ban kem ïa 168 ngut ki briew halor ka jingpynkheiñ jong ki ïa ki kyndon aiñ.
