Shillong, Nailar 23
U Myntri Rangbah, u Conrad K Sangma, ha ka Sngi Thohdieng u la poi shah sumar ha Civil Hospital, Shillong hadien ba la lap ba u la ïoh ïa ka jingpang ‘Scrub Typhus’ bad ‘Typhoid’.
Ha u kyrwoh khubor na ka sorkar, la ong ba u Myntri Rangbah u la sngew shitom hynne ka sngi ha kaba u la don ka jingshit met bad ka jingshitom kaba la kham jur. Ha ka banyngkong, la ong ba la sumar shwa ha ïing. Hynrei hadien ba la peit bniah ïa ka snam, la shem ba u Myntri Rangbah u la ïoh ïa ka jingpang ‘Scrub Typhus’ bad ‘Typhoid’.
Shuh shuh la ong ba hadien ba ka jingshit ka khlem hiar, la pynkit noh ïa u Myntri Rangbah sha Civil Hospital. Ha kane ka jaka sumar jong ka sorkar, la peit bniah ïa u Conrad da ki doktor kiba la tbit ha ki liang bapher-bapher.
Nalorkata, la ong ba watla ki dak ki shin jong kitei ki jingshitom ki dang jur ha ka met jong u, hynrei ki dkhot met bakongsan ki biang, bad ki doktor ki dang peit bniah ïa ka koit ka khiah jong u Myntri Rangbah na ka por sha ka por.
