Shillong, Nailar 23
Watla kiba bun ki heh ki haiñ kim ju kham smat ban phah leit sumar ha ki jaka sumar ne Hospital ba pynïaid da ka sorkar khamtam ha ka jylla lajong, hynrei u Myntri Rangbah, Conrad K Sangma, u la pyni da ka nuksa da kaba leit phah sumar ha Civil Hospital, Shillong, kaba dei ka shlem ai jingsumar kaba heh tam jong ka sorkar jylla ha Meghalaya.
Ha ka Sngi Thohdieng, u Conrad u la leit phah sumar ha Civil Hospital hadien ba ka jingpeit bniah ïa ka snam jong u ka la pyni ba u la ïoh ïa ka jingpang ‘Scrub Typhus’ bad ‘Typhoid’.
Ha ka banyngkong, la sumar ïa u Myntri Rangbah ha ïing sah, hynrei hadien ba ka jingshit ha ka met ka khlem hiar, la peit bniah ïa ka snam, bad na kane, la lap ba u la ïoh ïa kine ki artylli ki jingpang.
Hynrei, u Myntri Rangbah u khlem jied ban leit phah sumar ha ki hospital jong ki ‘riew shimet kiba bun byllai ha kane ka sor, bad u la leit sha ka shlem ai jingsumar jong ka sorkar.
Ïa mynta, ki doktor ba la kham rangbah bad kiba la don ka jingtbit ha ki liang bapher-bapher ha Civil Hospital ki dang peit bniah ïa ka jinglong jingman ka met ka phad jong u Myntri Rangbah.
