Vijayawada, Nailar:
Ki jingpyrshang ki dang ïaid shakhmat ban pyndep ïa ki 1.55 lak tylli ki ïing kum shi bynta jong ka jingthmu pyntreikam ba 100 sngi,” ong u Myntri ba dei khmih ïa ka tnat Housing and Information and Public Relations u Kolusu Parthasarathy.
U Myntri ha ryngkat ka MLA ka thaiñ ka Vasantha Krishna Prasad, bad ki heh sorkar ki la leit jurip ïa ki jingtei ïing ha ki bynta bapher bapher jong ka Mylavaram konstitwensi jong ka NTR distrik ha ki khyndiat sngi ba la leit badn bishar bniah ruh halor ki rukom pynïaid ïa ki kam.
Kum ka jingpynrem jur halor ka sorkar bahashwa jong ka YSRC halor ka jingpynkylla ïa ka pisa kaba kot sha ka T. 4,500 klur kaba la mang na ka bynta ban shna ïing ïa ki baduk, u Parthasarathy u la kynnoh ba ka jinglong khlem da shimkhia bad khlem jingkitkhlieh jong ka synshar barim ka la khanglad ïa ki paidbah ban ïoh ïa la ka jong ka ïing.
Ha kane ka sngi, u Myntri u la ong ba ka sorkar synrop ka la buh thong ban pyndep haduh 7 lak tylli ki ïing hapoh shi snem ha baroh kawei ka Jylla, da kaba bynrap ba yn shna ïa ki ïing ba paka na ka bynta uwei pa uwei u nongïoh myntoi ha ka Jylla haduh u snem 2029.
Haba pyntip ba ka sorkar kmie ka la ai jingbit ïa ka Jylla haduh 21 lak tylli ki ïing naduh u snem 2016, u Myntri u la kdew ba tang 6.8 lak tylli ki ïing kiba la shna haduh mynta.
U Myntri Rangbah ka jylla u Nara Chandrababu Naidu u la buh jingmut kyrpang ban rah shakhmat ïa ka jingshna ïa ki ïing bad u la bthah ïa ki ophisar ba kin pynsted ïa ka jingshna ïa baroh ki ïing kumba la buh haduh u snem 2025, u la pynshai.
Da kaba pynpaw ba kam don ka lad ban ïoh pisa na ka sorkar kmie lada jia ba ym lah ban pyndep ïa ki ïing haduh u bnai Lber, 2025, u Myntri u kwah ba ki nongïoh myntoi kin wan shakhmat ban pyndep kloi ïa ki ïing.
Haba jubab ïa ki jingujor ban ai jingbit ïa ki ïing sha ki bym dei ki nongïoh myntoi, u la ong ba yn sa shim ïa ka jingtohkit bad yn weng noh ïa ka jingai bynta lada jia ba don ki jingdkoh treikam.
