Shillong, Nailar 25
Ka Madan S&CC ka la long ka lahduh ha ka lympung ïalehkai Under-20 Fourth Division Football League 2024 ïa kaba la pynïaid da ka Shillong Sports Association (SSA), hadien ba ka la lah ban pynliem noh ïa ka Umrynjah Sports Club ha ka jingïakhun ïa ka final kaba la long ha ka sngi Saitjaiñ ka 24 tarik u Nailar 2024 ha madan First Ground, Polo.
Haba phai sha ka jingïakhun final ha kane ka sngi hapdeng kine ki ar tylli ki kynhun, ka Madan S&CC ka la pynliem noh ïa ka Umrynjah Sports Club da 2-1 kol bad kane ka nam jop jong ka Madan ka la wan urlong lyngba ki kol ba la ïoh ban thep da u Jason T Malsamtluanga ha ka minit kaba 41 bad u Phermanbha Lyngdoh uba la thep ha ka minit kaba 48, katba ka Umrynjah SC ka la ïoh ban pynphai shi kol lyngba u Samborlang Jyrwa uba la thep ha ka minit kaba 63 bad haduh ba kut kam shym la lah shuh ban pynïakhaid watla ka la pyrshang katlah katïai.
Kine ar tylli ki club kiba la rung sha ka final jong kane ka lympung, kata ka Madan bad ka Umrynjah ki la kiew kyrdan mynta sha ka Third Division ha kaba kin ïoh ban ïashim bynta naduh u snem ban wan.
Ïa ki khusnam sha ka lahduh bad shah rem final ha kane ka sngi la sam da u President ka Synjuk u Bah Banteidor Lyngdoh ha ryngkat ka jingïadon lang u Bah B Diengdoh bad u Bah SS Rapthap kiba long ki Secretary barim lem bad kiwei pat ki para dkhot jong ka Synjuk.
