New Delhi, Nailar:
Ka seng BJP ka la dep ban pynbna ïa 9 ngut ki kyrtong na ka bynta ka ilekshon shiteng samoi jong ka Rajya Sabha na ki 8 tylli ki jylla. Kiba pawkhmat napdeng kine ki long arngut ki Myntri khynnah ha ka kynhun Myntri jong u Modi katba uwei pat u dei u President barim jong ka Bar Council bad u heh nongïasaid aiñ jong ka Supreme Court na Bihar. Kane ka ilekshon shiteng samoi kan long ha ka 3 tarik u Nailur.
Ki Myntri ka sorkar kmie kiba kynthup ïa u Ravneet Singh Bittu (Rlys MoS) u la shah pynbna kyrteng na Rajasthan katba u George Kurian (MoS Animal Husbandry), u la shah pynbna kyrteng ban ïakhun na Madhya Pradesh. U Bittu ïa mynta u dang shakri ïa ka kam kum u Myntri khynnah jong ka tnat Railway bad Food Processing Industries. U la mih noh na ka seng Congress bad u la pynïasoh bad ka seng BJP hashwa ka ilekshon Lok Sabha jong une u snem. U Myntri ka sorkar kmie u George Kurian u la shah pynïakhun na ka shuki ba la sah thylli kaba la mih hadien ba u Jyotiraditya Scindia u la shah jied sha ka Lok Sabha ha u snem 2024 na Guna konstitwensi. U Kurian u dei na Kerala bad u la don bad ka BJP naduh u snem 1980. Ka BJP ka la pynïakhun ruh ïa ka nongïalam barim ka seng BJD ka Mamata Mohanta na Odisha bad ka nongïalam barim jong ka seng Congress ka Kiran Choudhary na Haryana.
Baroh arngut kine ki nongïalam ki la pynïasoh sha ka seng BJP dang shen bad la khmih lynti ba kin shahjied sha Rajya Sabha. Ka Myntri barim jong ka Haryana kaba dei ruh ka MLA na Tosham, ka Choudhary, 69 snem ka rta, ka la pynïasoh sha ka BJP ha ryngkat ka khun jong ka ka Shruti bad ki nongkyrshan jong ki ha u bnai Jylliew. Katkum ka thup kyrteng ba la wanrah da ka BJP kaba don ïa ki kyrteng jong ki 9 ngut ki kyrtong, la kynthup ruh ïa ka kyrteng jong u Manan Kumar Mishra uba long u heh Advocate ha Supreme Court bad u Chairman jong ka Bar Council of India.
Une u la shah pynïakhun na Bihar katba u Dhairyashil Patil na Maharashtra bad u Rajib Bhattacharjee na Tripura. Katkum ka rukom sam bad ïabhah konstitwensi jong ka NDA na ka bynta ka ilekshon Lok Sabha ha Bihar, ka seng jong u Kushwaha ka dei ban ïoh ïa ka shuki ha Parliament bad sa kawei pat ka jaka ha ka dorbar thaw aiñ jong ka jylla. U Kushwaha u la ïakhun ha ka konstitwensi Karakat, kaba u la jop na ka bynta ka NDA ha u snem 2014, hynrei u la wan ha ka kyrdan kaba lai hadien u Raja Ram Kushwaha jong ka CPI(ML), uba la jop, bad u Pawan Singh uba la wan ba-ar. Ka Maharashtra, ka dei kawei na ki saw tylli ki Jylla, kiba dei ban leit thep vote, ha kaba la thmu ban leit thep vote mynta u snem.
U Battacharjee u dei u president jong ka kynhun jong ka seng BJP ha Tripura. Ki heh nongïalam jong ka seng kmie, kiba pyndonkam ïa ki enjineer ha ka ban jied kyrtong ki la pynïakhun ruh ïa u Ranjan Das bad u Myntri barim ka sorkar kmie u Rameswar Teli kum ki kyrtong jong ka na Assam. Ha kane ka kynti, ka ilekshon na ka bynta ki 12 tylli ki shuki ha Rajya Sabha kiba dang thylli kan long ha ka 3tarik Nailur hadien ba shiphew tylli na kine ki shuki ki la sah thylli namar ba ki dkhot kiba bat ïa ki, kynthup ki Myntri ka sorkar kmie kum u Piyush Goyal, u Sarbananda Sonowal bad u Jyotiraditya Scindia ki la shah jied sha ka Lok Sabha.
