New Delhi, Nailar 26
Kum ka jingbuddien ïa ka jingthmu jong u Myntri Rangbahduh, u Narendra Modi ban kyntiew ïa ka roi ka par jong ka Ladakh kaba riewspah, ka tnad kam pohïing ka la rai ban plie 5 tylli ki distrik bathymmai ha kane ka Union Territory.
Haba ai jingtip shaphang kane ka rai kaba kyrpang ha ka ha ka rynsan lad pathai ‘X’, u Myntri kam pohïing bad Cooperation jong ka Sorkar Pdeng, u Amit Shah u la ong ba lyngba kane ka rai, ki distrik bathymmai – Zanskar, Drass, Sham, Nubra bad Changthang – kin pynpoi ïa ki jingmyntoi ba dei na ka bynta ki briew sha ki tyngkong ïing jong ki da kaba pynkhlaiñ ïa ka rukom synshar ha man ki jaka.
Hadien ka jingplie ïa kine ki 5 tylli ki distrik, mynta baroh kin don hynñiew tylli ki distrik ha Ladakh, kynthup ka Leh bad Kargil.
Ka Ladakh ka long ka Union Territory kaba heh bha ha ka liang ka jingheh ka jaka bad mynta, ka Ladakh ka don 2 tylli ki distrik – ka Leh bad Kargil. Ka long kawei na ki jaka ba dang duna ka jingbun briew ha India.
Namar ka jinglong ka jaka kaba kham jynjar ban poi, mynta ki bor pyniaid distrik ki mad shibun ki jingeh ban poi sha ki jaka nongkyndong. Hadien ka jingplie ïa kine ki distrik, mynta baroh ki skhim jong ka Sorkar Pdeng ba ïadei bad ka bha ka miat bad jong ki bor pynïaid jong ka Ladakh ki lah ban poi sha ki briew bad kham bun shuh-shuh ki briew kin ïoh ïa kine ki jingmyntoi.
Kane ka rai bakongsan jong ka tnad kam pohïing kan long ka jingmyntoi ha baroh ki liang jong ka roi ka par jong ka Ladakh.
Nalor ka jingai jingmynjur ban plie sa 5 tylli ki distrik ba thymmai, ka tnad kam pohïing ka la bthah ïa ki bor pynïaid jong ka Ladakh ban thaw ïa ka komiti ban lum jingtip ïa ki bynta bapher-bapher ba ïadei bad ka jingplie ïa ki distrik bathymmai, kum ki ‘headquarter’, u pud u sam, ka jinglong ki kam pynïaid bad ka jingwanrah ïa ki kam, bad kiwei-kiwei ki bynta ba ïadei bad ka jingplie ïa ka distrik bad kiwei-kiwei bad ban phah ïa ka kaiphod jong ka hapoh lai bnai.
Hadien ba la ïoh ïa ka kaiphod na ka komiti, ka Union Territory ka Ladakh kan phah ïa ka jingtyrwa ba khatduh ba ïadei bad ka jingplie ïa ki distrik bathymmai katkum ka nongrim jong kane ka kaiphod sha ka tnad kam pohïing na ka bynta kiwei-kiwei ki sienjam.
Ka Sorkar u Modi ka la kut jingmut ban wanrah shibun ki lad ki lynti na ka bynta ki briew jong ka Ladakh.
