Hyderabad, Nailar:
U Symbud Myntri Rangbah u Mallu Bhatti Vikramarka u la kam ba katba ka sorkar ka la pyllait ïa ka pisa kaba T.18,000 klur sha ki Bank ban poi sha ka jingmap ïa ka ram halor ki mar rep, la ïoh ban pdiang tang kumba 7,500 klur ka pisa ba la ïoh ban pdiang da ki nongrep haduh mynta.
“Wat haba la dap shi taïew ka jingpynslem ban pyllait ïa ka ram kim kwah ban ïoh ïa ka jingmyntoi,” u la ong haba kren ha ka jingïalang jong ki nongtrei bank ha ka jylla ha Praja Bhavan ha Hyderabad.
“Da kaba jop ïa kiba bun ki jingeh, ngi la lum pisa da T. 18,000 klur bad pynkylla ïa ka pisa ha ka por kaba shi bnai. Ha ka 18 tarik Naitung, ngi la sdang ïa ka bynta kaba nyngkong, ka bynta kaba ar ka la long ha ka 30 tarik, Naitung bad ka bynta kaba lai ha ka 15 tarik, Nailar. Tang hapoh shi bnai ngi la pyllait T.18,000 klur, da kaba pyrkhat ba lada ki nongrep jong ngi ki ïoh jingïarap ha ka por kaba biang, ki lah ban thep biang ïa ka pisa jong ki ban pynmih kham bun shuh shuh ki jingthung. Hynrei katkum ka jingbuh jingkheiñ ka ong ba tang T. 7,500 klur ka la poi sha ki nongrep. Kumta, nga kyrpad ba phin pynthikna ba kano kano ka pisa kaba ngi la pyllait kan poi sha ki nongrep ha ka por kaba biang. Khamtam eh ha ka jingai ram ha ka rep ka riang, kam don jingmyntoi ei ei lada ym ai jingïarap kumba dei ban ïoh ha ka por kaba biang. Kam lerkam ei ei lada phi pynslem wat tang shi sngi ruh.”
Hadien kata, ka jaka treikam jong u Symbud Myntri Rangbah ka jylla ka la pynmih ïa ka jingpynbna kaba ong: “Ka sorkar jylla ka la pyllait ïa ka pisa kat T. 18,000 klur sha ki Bank na ka bynta ka jingpyllait ïa ka ram rep. Ki Bank ki pynslem ban ai ram bathymmai sha ki nongrep. Ki Bank haduh mynta ki ai ram bathymmai sha ki nongrep tang T. 17,300 klur, kaba ym ïahap satia. Ki nongtrei Bank ki la pynsahteng ha kaba ïadei bad ka jingpynpoi pisa sha ki nongrep. “
U Bhatti u la ong, “Ka rep ka riang ka dei u budlum jong ka jylla bad la pynïar ïa ka jingkyrshan ban bei tyngka sha ki nongrep lyngba ka jingpyllait ne map ïa ka ram bad ka Rythu Bharosa bad la mang pisa na ka bynta ban pyndep ïa ki projek ai um kiba heh bad kiba pdeng. Ka sorkar ka ai ruh ïa ka bording khlem donkam jingsiew kaba 24 kynta bad ki nongrep ki lait na ka jingkit ram. Kine ki sienjam baroh kin pynkhlaiñ ïa ka rep ka riang bad ki kam ba ïadei bad ka.”
U la pynpaw biang ba la buh hakhmat eh ïa ka kam karkhana ruh kumjuh bad ka sorkar ka ïaid shakhmat da ki rukom pyntreikam ki bathymmai. Ki karkhana rit bad pdeng kin pynmih kam pynmih jam kiba bun, u la ong bad kyrpad ïa ki nongtrei Bank ban ailad ïa ki ram da kaba laitluid sha ki nongseng kam seng jam.
U la pan jingïarap ruh na ki Bank ban ai ram khlem jingsiew sut ïa ki Self Help Group hapoh ka Indira Mahila Shakti Scheme na ka bynta ban kyntiew ïa ki karkhana. Ka sorkar ka thmu ban ai da ka ram kaba `.1 lak klur kaba lait na ka jingkheiñ sut na ka bynta san snem sha ki SHG, u la bynrap.
