Chandigarh, Nailar:
Ki shipai ka tnat Border Security Force (BSF) ki la ujor pyrshah da kaba tyngeh ïa ki shipai ka Pakistan Ranger hadien ba kane ka ri bamarjan ka la buh bad pyni ïa ka dur kaba heh jong u nongïalam uba la khlad noh jong ka kynhun pyrshah sorkar jong ka Kashmir, u Syed Ali Shah Geelani jong ka Hurriyat Conference ha ka Joint Check Post jong ka Attari -Wagah.
Kumba la ïathuh ki tyllong khubor ba la ïohlum la ong ba ïa kane ka dur la buh hajan ka jaka ba la pynhap lama ha ka JICP kaba don ha ka liang jong ka Wagah ha Pakistan.
“Ïa kane ka dur la buh dang shen bad ngi la pynpw ïa ka jingpyrshah jur ïa kane ka jingleh jong ki shipai Pakistan namar kane ka thaiñ ka dei tang na ka bynta ki shipai bad ki jaka ba ju pyndonkam haba don kino kino ki jingrakhe. Ïa kane ka dur ym dei ban buh ne pyndonkam na ka bynta ki kam saiñ pyrthei ne saiñ hima-sima, ïa kane ka dur la dei ban weng noh shi syndon,” la ong u heh jong ka tnat BSF ubym shym kwah ban pynpaw kyrteng.
Shuh shuh u la ong ba kane ka jingleh jong ka Pakistan ha kane ka jaka kaba pawnam ka long ban pynkhih jingmut ïa ki nongjngohkai kiba wan na ka bynta ka jinglehkmen Beat-the-Retreat — ka jinglehkmen jong ki shipai kaba pynpaw ïa ka jingkut jong ka sngi ba la buh kyrpang.
Ka dei ka kam kaba pynkhihwin ban pynpaw ïa ka mat Kashmir bad ban wanrah ïa ki kynrum kynram bad ki jingbymïasngewthuh jingmut.
Ka jingpyni ïa ka dur jong u Geelani uba long u nongïalam ba pawkhmat hynrei uba long ka daw ban pynmih ïa kiba bun ki jingïakynad bajur bad ki jingïakhih ha Kashmir, ha ka Check Post ha khappud ka lah ban long shi bynta na ki buit sianti jong ka Pakistan ban pynpaw ïa ka jingai jingkyrshan kaba skhem na ka bynta ka jingïakhih pyrshah sorkar naba kane ka la jia ha ka por ba dang jur ki kam pyntriem jong ki lehnoh bad hashwa ban pynlong ïa ka ilekshon ha Jammu & Kashmir.
Kane ka ri bamarjan ka la kwah ban pynmih ïa ki jingpyrshah bad kumjuh ban wanrah ïa ki kynrum-kynram.
Nalor kane, la ong ba ka dei ruh ka jingleh thok ban pynkylla ïa ka jingpyrkhat na ki kam poh-ïing jong ka.
Sa uwei pat u heh jong ka kynhun jong ka sorkar kmie u la bynrap shuh shuh da kaba ong ba kane ka jingleh ka i kumba ka dei ka buit ban khring ïa ki jingmut jingpyrkhat jong ki ri ka pyrthei bad ban pynleit jingmut halor ka mat ba ïadei bad ka Kashmir.
