Bengaluru, Nailur:
U Symbud Myntri Rangbah jong ka Karnataka u D K Shivakumar ha kine ki khyndiat sngi u la pynpaw biang ba un long u kyrtong jong ka seng Congress na ka bynta ban ïakhun ïa ka ilekshon shiteng samoi ha Channapatna wat la u dei uba ïakhun na kane ka jaka da ka tiket jong ka seng jong u.
Ka konstitwensi kaba don ha Ramanagara distrik ka la sah thylli hadien ba u Second-in-Command jong ka seng JD(S) u H D Kumaraswamy u la iehnohkam na ka ïingdorbar hadien ba u la jop ha ka ilekshon Lok Sabha na Mandya kum u kyrtong ka NDA bad u la long ruh kum u Myntri jong ka sorkar kmie uba dei khmih ïa ka tnat Steel and Heavy Industries.
“Nga dei uba ai ïa ka B-form bad nga dei u nongsoi na ka bynta jong ka. Kumta, ka dei ka jingthep vote na ka bynta jong nga, kam pher mano mano ba ïakhun,” la ong u Shivakumar ha ki nongthohkhubor ha ka ïingsah jong u kaba ha Sadashivanagar. Namar ba ka seng Congress kan shim ïa ka jingpyrshah lang jong ka BJP bad ka JD(S) ha kane ka ilekshon shiteng samoi, u Shivakumar u la ong ba kan ym don jingpher mano ba ïasnohktilang.
Haba jubab ïa ka jingkylli hato un pdiang ne em ïa u MLC ka BJP u C P Yogeshwara lada u pyni ïa ka jingkwah ban rung sha ka Congress, u la ong ba ym don mano mano ruh ba leit sha u bad kum kine ki jingtyrwa kim don hakhmat jong u.
U Kumaraswamy u la jop nangne ha ka jingïakhun ïa ka ilekshon Assembly ha u snem 2023 bad ha ka ilekshon Lok Sabha na Mandya ha u snem 2024.
Ka Congress ka pyrshang tyngeh ban knieh ïa ka shuki na ka seng JD(S), hynrei ki nongïalam ka JD(S) ki la ïoh mynsiem na ka jingïateh lok kaba ka la thaw bad ka BJP.
