Lucknow, Nailur:
Ka kynhun jong ka tnad ba dei khmih ïa ki khlaw, ka la ïoh kem sa ïa uwei u suri, ha ka Sngi Ba-ar uba la long uwei napdeng ka kynhun jong hynriew tylli ki suri kiba la thombor bad pyntieng pynsyier ïa ki nongshong shnong jong ka Bahraich kaba don ha Uttar Pradesh.
Une u dei u suri uba san ba la ïoh kem da ka kynhun ba dei khmih ïa ki khlaw hapoh ka jingtreikam jong ka ‘Operation Bhediya’, na ka shnong Harbaksh Purwa kaba don ha Bahraich. Ïa une u suri la ïoh ban kem najan ka wah Ghaghara, ka jaka kaba la ïoh ban kem shwa ïa uwei u suri. Da kane, ïa mynta dang don sa uwei u suri uba dang shang laitluid bad don shabar jong ka khlaw ha Bahraich. Kumba la ïathuh, la ong ba ki la don kumba 35 tylli ki shnong ha Bahraich distrik kiba la pynjur bha ïa ka jingthwet bad ka jingpeit ngor naba ki suri ki la dep ban pynïap haduh 10 ngut ki briew, kynthup ïa iwei i khynnah iba dang 9 snem ka rta, ha ka shi bnai shiteng mynta.
Ki la don ruh kumba 36 ngut ki briew kiba la mynsaw na ka jingshah thombor ha ki suri ha Bahraich. Ka sorkar Uttar Pradesh, ka la pynbna ba katei ka jingthombor jong ki suri, ka dei ka ‘jingshah ktah jong ki mrad khlaw’. Ki jingjia ba dang shen jong ka jingthombor jong ki suri ha Bahraich ki la pynlyngngoh ïa ki riew shemphang, namar ba la tip ba ki mrad ki long kiba jemnud bad kiba jar-jar kumba dei ban long ka jinglong jong ki.
U General Manager jong ka UP Forest Corporation u Sanjay Pathak u la ong ba ki suri ki don ka jinglong ban wad ïa ka kput kylliang lada ki ïing ki sem ne ki khun jong ki ki shah pynmynsaw ne shah pynma. Katkum ka jingïathuh jong ki nongshong shnong ki la ong ba la lap ba ki la don ki thliew jong ki suri ha ka lyngkha ba ju rep ïa u pai ha kaba ka la shah pynjulor noh na ka jingshlei um, ha kaba kane ka la pynïap ïa ki khun suri, nangne ka la mih ka jingshang lymwir bad ka jingbuhshun jong kine ki mrad.
