Chandigarh, Nailur:
Ka seng Aam Aadmi Party ha ka Lah Sngi U Blei ka la pynmih ïa ka thup kyrteng kaba nyngkong jong ki kyrtong kiba kynthup ïa 20 tylli ki kyrteng ki ban ïakhun na ka bynta ka ilekshon Assembly ha Haryana ha ka por ba ka la pynbna ba ka seng kan sa ïakhun marwei.
Kane ka rai ka la mih hapdeng ka por ba dang don ka jingïakren na ka bynta ban ïatreilang hapdeng ka AAP bad ka Congress kaba la ïaid shakhmat bad ha ka por ba don ka jingthep kyrteng na ka bynta ka jingïakhun ilekshon ka ban kut ha ka 12 tarik, Nailur.
Ka seng Aam Aadmi Party ka la phai khmat sha ki konstitwensi kiba kham paw bad ka la pynkhlaiñ ïa ki jingpyntreikam wat lada ha ka thup kyrteng kaba nyngkong la rai ban pynïakhun ïa u Anurag Dhanda na Kalayat, ka konstitwensi ba la bat da u Myntri Rangbah barim u Bhupinder Singh Hooda, katba ïa u Indu Sharma pat la rai ban pynïakhun na Bhiwani.
U Vikash Nehra un ïakhun na Meham bad u Bijender Hooda na Rohtak. U Kuldeep Gadrana na Dabwali, ka thaiñ kaba la tip bha na ka bynta ka jingïadei bad ka longïing Chautala.
Kiwei pat ki kyrtong kiba pawnam ki long u Kuldeep Chikara ha Bahadurgarh, u Randir Guliya ha Badli, u Sonu Ahlawat Sheria ha Beri, u Ravinder Faujdar ha Ballabhgarh, u Dharmender Khatana ha Sohna, bad u Bir Singh Sarpanch ha Badshahpur.
