Shillong, Nailur 13
Kum ka dak jong ka jingkynjoh ïa u mamwer ba 50 snem ha ka jingshakri ïa ka kam naduh ba la seng ha ka snem 1974, ka Meghalaya Govt. Drivers’ Welfare Association (MGDWA) sengkmie, Shillong ha ka Sngi Thohdieng ka 13 tarik u Nailur 2024, ka la pynlong da ka prokram ban plie ïa u mawnongrim bad pynher ïa ka lama jubili ksiar kaba la pynlong ha ka ophis treikam ka seng kaba don mar pyrshah bad ka Yojana Bhavan, Main Secretariat.
Ha katei ka sngi, la pynher ïa katei lama jubili ksiar ka seng da u Chief Secretary ka Sorkar Jylla, u Bah Donald P. Wahlang.
Ha katei ka sngi la ïoh jingkren na u President ka MGDWA sengkmie, u Bah C. Syiemlieh bad ka jingkren pdiang sngewbha na u Bah T. Syiem uba dei u Finance Secretary ka seng.
Haba ai jingkren ha katei ka sngi kum u kongsan, na ka liang u Bah Donald P. Wahlang u la ai ka jingïaroh ïa kitei ki nongshakri Sorkar kiba dei ki nongñiah kali kiba la trei shitom bad trei borbah ha ki kam jong ki.
U la kitbok-kitrwiang ruh ïa kitei ki nongñiah kali Sorkar baroh ba kin dang ïai trei kham bha ïa ka kam jong ki bad kumjuh ruh ba kin ïai tylli kum kawei ka seng hapoh kawei ka shatri ban ai jingshakri ha ki kam jong ki.
