Shillong, Lber 11
Ka jingïakren hapdeng ki Nongïalam ka Khasi Students’ Union (KSU) bad ka Sorkar ha ka janmiet Sngi Ba-ar kam shym la poi satia shano-shano halor ka Meghalaya State Investment Promotion & Facilitation (MSIPF) Act, ha kaba ki Nongïalam ka KSU ki la ong ba kim hun satia ïa ki jubab bad kim shaniah ïa ki jingkular ba tang da ka ktien na ka Sorkar.
Hadien ba da ki spah ngut ki dkhot jong ka KSU ki la leit tur sha ïingdorbar thaw aiñ ha ka step jong ka Sngi Ba-ar ban pyrshah ïa ka aiñ MSIPF, u Myntri Rang-bah ka Jylla, Conrad K Sangma u la khot ïakren ïa ki Nongïalam ka seng ha ka por janmiet ryngkat ka jingïadon lang jong ar ngut ki Symbud Myntri Rangbah, Bah Prestone Tynsong bad Bah Sniawbhalang Dhar nalor u Chief Secretary, Bah DP Wahlang bad kiwei ki heh ophisar.
Haba kren sha ki lad pathai khubor hadien ka jingïakynduh bad ki heh Sorkar, u President ka KSU, Bah Lambokstarwell Marngar u la ong ba ka seng kam hun satia ïa kane ka jingïakynduh, namar ka Sorkar ka khlem ai kano-kano ka jingkular da ka jingthoh, hynrei u Myntri Rangbah u la shu kular tang da ka ktien ban pynkylla biang ïa kane ka aiñ ha ka dorbar synrai mynta u snem, da kaba shim lang ïa ka jingpynsngew jong baroh kiba don bynta kynthup ki kynhun sengbhalang.
“Ka jingïakren kam long kaba sngewhun bad kaba dap shibun ki jingartatien, hooid, na ka liang u CM u la kubur ïa ki jingma ba ngi la ai jingthoh naduh u Kyllalyngkot ban pynbha shwa ïa ka aiñ baroh kawei. Kaba ngi ïohi ki don shibun ki jingduna kiba donkam ban pynbha bad pynjanai ba ïoh lehse ki long ki jingriam ïa ka jinglong trai jong ngi halor ka khyndew ka shyiap bad ki jinglong ba kyrpang jong ngi”, la ong u Nongïalam KSU.
U la ong ba ha ka jingïatai, ka Sorkar ka la pyni ïa la ki jong ki nia ki jutang wat hapdeng ki mat ba ka seng ka la pynsngew bad ai jingthoh.
“Tang da ka ktien u la ong ba u dang donkam ïa ka por ban pdiang ïa ki jingai jingmut jong ngi. U la kren shuh-shuh ba ïa kane ka aiñ donkam ban dang pynbha ha ka dorbar synrai, hynrei haduh katno ngin shaniah. Na ka liang ka seng ngi kren da kaba shai ba ngim sngewhun ïa kane ka jingïakynduh mynta ka sngi, ngin sa shong pyrkhat kum ka CEC kiei ki lad ki lynti ba ngi lah ban leh, namar ngim kwah ba kano-kano ka aiñ ba ka Sorkar ka wanrah kan long pynban u mawjynthut bad jingduhnong ïa ki trai ri trai muluk”, u la ong.
U la ong ba ka seng ka phah ïa ka kyrwoh sha ki MLA Khasi, ba lada ki don ka jingkitkhlieh kaba shai kaba beit ba ki kwah ban pynhun ïa u paidbah uba la jied ïa ki, ki dei ban ong tang kawei ka kyntien ba donkam ban pynsangeh shwa ïa kane ka aiñ.
“Hooid, u CM u tyrwa ba ha ki amendment ban sa leh un sa khot ïa ki sengbhalang bapher-bapher, ki Synjuk Nongsynshar Shnong ban ïamir ban ai jingmut, hynrei ha ka por ba ki leh ïa kane, balei kim lum kim lang ïa kita baroh kiba don bynta?” la ong u Bah Lambokstarwell.
Haba kylli halor ka lynti rel, na ka liang u General Secretary ka KSU, Bah Donald V Thabah u la ong ba ka seng ka pyrshah beit ïa ka lynti rel bad kam treh ban ïakren eiei ruh halor ka mat lynti rel.
