New Delhi, Nailur:
Ka jingpynbna ba la ai da u u Myntri Rangbah ka Delhi, u Arvind Kejriwal, ha ka Sngi U Blei, ba un iehnohkam, na ka kam kaba hakhliehduh jong u, ka la wanrah ïa ki jingkynthoh halor u nongmihkhmat jong u, ha kaba ki kyrteng jong kiba bun ki heh nongïalam jong ka AAP, ki la bna kylleng. Kumba la ïathuh ka tyllong khubor la ong ba ka jinglah ban ïoh ïa u nongmihkhmat ka kynthup ïa ki riewthawaiñ ba mynta jong ka Delhi kum ka Atishi, u Saurabh Bharadwaj, u Kailash Gahlot, u Gopal Rai bad u Imran Hussain.
Ka lad ka kabu ka plie ruh na ka bynta ka kurim jong u Arvind Kejriwal, ka Sunita Kejriwal, na ka bynta ban bat ïa katei ka shuki.
Ki la don kumba katto katne ngut ki nongïalam kiba la ong ba ïa ki nongïalam jong ki lah ban thung kum u ne ka Myntri Rangbah ban wan jong ka jylla, wat lada kim shym la pynbna ïa ka kyrteng kaba kyrpang.
U nongaibuit ai bor jong ka seng AAP dalade u la kyntait halor ka jingbym lah jong u Symbud Myntri Rangbah barim jong u, u Manish Sisodia ba un shimti ïa ka kam bad u la pynthikna ba yn sa don da mano mano na ka seng AAP ban pyndap ha ka shuki jong u haduh ban da dei ban pynlong ïa ka ilekshon.
Ka samoi treikam ba mynta jong ka ïingdorbar ha Delhi kan kut noh ha ka 11tarik, Rymphang, 2025.
Ïa ka ilekshon Assembly kaba khatduh la dep ban pynlong ha ka 8 tarik, Rymphang, 2020. Ka AAP ka ïoh 62 tylli ki konstitwensi bad ka seng Bharatiya Janata Party (BJP) ka la ïoh 8 tylli ki konstitwensi ha ka kynhun jong ki 70 ngut ki dkhot ha ka ïingdorbar.
Ha kum kane ka por, u Sisodia ruh u la pynbna ba un ïalap ilekshon ha ryngkat u Kejriwal, da kaba pynïoh ïa ki vote kiba pynshong nongrim halor ka jinglong hok bad un ym shimti ïa kano kano ka kam sorkar tad haduh ba un da ïoh ïa ka jingsaitkhuid jong ki paidbah.
Napdeng ki nong-ïakhun bahakhmat eh na ka bynta ka shuki Myntri Rangbah, ka Atishi ka la pawkhmat namar ka jinglah pynïaid jong ka ïa ki kam bahakhmat eh, kynthup ha ka liang ka pule-puthi, ka pisa-tyngka, ka khajna bad ka aiñ.
U Kejriwal hashwa u la jied ïa ka ba kan pynher ïa ka lama lai rong ha ka sngi ba la rakhe ïa ka jinglaitluid jong ka ri ha ka jaka jong u.
Hynrei ïa kane ka jingtyrwa la kyntait bad u Lieutenant Governor ka Delhi u la jied ïa u Gahlot na ka bynta kane ka kam ha ka jaka jong ka.
U Arvind Kejriwal, u la bam smai kum u Myntri Rangbah, ha ka 16t tarik, Rymphang, kaba la long ha ka sien kaba lai, naduh u snem 2013, ha kaba u la jop nyngkong eh ha ka jingïakhun ïa ka ilekshon.
