U Nongsaiñ Hima,1965
Ka jingïakhih, ki thma, bad ka jingiapbriew ha ki katto katne ki thaiñ ha ka pyrthei, ka la pynkhih jingmut ïa bun ki ri, ïa ka jingma ba ioh khie ka thma bah tang hapdeng shi khyllip mat, namar ioh kaba u briew u la tei, u la ioh, baroh ki jingstad ki jingphylla, kiba ngi iohi mynta kin shu um bad sep ei lut baroh.Kane ka jingma ka long kaba shisha haba yn pyndonkam ha kum kane ka thma da ki tiar ialeh nuclear kum ki Atom Bom kiba shyrkhei shibun. Kumta ka dei hok ba ka pyrthei ka dei ban tieng ïa kane bad ban sumar ioh ki jingïakhih kiba hangne hangtai ki lah ban pur bad bthei ha ka dur jong ka thma bah.
Ka jingjah sha kum kane ka thma kaba ka pyrthei ka la shu peit thlip, ka la thap bthei ha ka snem 1960 ha kaba ka America bad ka Russia ki la ïa pyneh triang na ka bynta ka Cuba. Hynrei kine ki ri ki long baroh ar kiba khlain bor kiba don ki tiar nuclear bad ka shu kut noh, namar imat ba kawei ka tieng ïa kawei. Hynrei kane ka jingma ïa ka jingkhie jong ka thma bah kan long kaba itieng ba ioh kiwei kiwei ki ri, kin sdang ban lum bad ban shna ïa kum kine ki tiar. Ka China ka long kawei na ki ri kaba la pynpaw sha ka pyrthei ba ka long kawei an kine ki bor nuclear da ka jingpyrshang pynbthei arsien ïa ki Atom Bom jong ka. Kumta ka Disarmanent Commission, ka seng jong ka ri kaba trei kam na ka bynta ban khang ïa ka jingphriang jong kine ki tiar nuclear, ka la sngewdei ban kynthup lem ïa ka China khnang ban the ïa ka hapoh ki aiñ ki adong jong kane ka seng.
Ka pyrthei mynta ka ïabeh ïa ka jingsuk, haba la ju iohi ba ha man ki dorbar jong ki hima ka pyrthei ka jingpyrta ka long ban ri ban ïada bad ban wanrah ïa ka jingsuk.
Ha une u bnai yn don artylli ki dorbar, kawei ka jong u Prime Minister jong ki ri kiba don hapoh ka Commonwealth ha London bad kawei ka jong ki ri ka Africa bad Asia ka ban long ha Algiers. Ka kam kaba kongsan jong kine ki dorbar, la sngewthuh, ba kin ïa tainia shaphang ka jingpynsah ïa ka suk pyrthei, khamtam haba ki la iohi mynta ia ka nuksa kaba itriem ïa ka thma bah jingiapbriew ha Vietnam.
La dei hok namar kata, ba ïa kum kine ki thma rit kiba long i phylla ding hangne hangtai la dei ban theh um pjah shisyndon, namar bunsien ba na kine kiba rit ka ju pur sha kaba heh. Kiba don ka jingsngewthuh jingmut kim mon satia ïa ki jingïapyniap briew bad ka jingpynjot ne jingpynjulor namar kane kam lah ban siew eiei bad kan long ka jingbeiñ ïa ka jingjop jong u briew ha kiwei ki bynta kiba la pynsan pynroi bad pynsuk ïa u. Kan shong ha ka jabieng bad jingstad jong ki khraw pyrkhat ki khraw jutang jong ki hima ka pyrthei ban pyllait ïa ka pyrthei.
