Bhubaneswar, Nailur:
Ka sorkar Odisha ha ka Sngi Balang ka la pynsted ban ai jingïarap ha ka ban pyllait im ïa ki nongshong shnong ha Balasore distrik naba ka jingshlei um ka la ïai bteng. Kane ka la pynlong ïa ki heh ba dei khmih ba kin pynkynriah shnong ïa palat 11,000 ngut ki briew sha ki jaka ba don jingshngaiñ. U Myntri Rangbah jong ka jylla u Mohan Charan Majhi, uba la leit jurip bniah ïa ki thaiñ ba shah ktah na ka jingshlei um lyngba ka liengsuiñ, u la bthah ïa ki heh ba dei khmih ba kin pyntikna ha ka ban lah ban pyllait im lut ïa ki briew kiba shong basah ha ki shnong kiba shah ktah na ka jingshlei jong ka um ha ka wah Subarnarekha kaba la kiew na ka jingjur jong u slap ha ki bynta ba shaphang Shatei jong ka Odisha bad ki thaiñ kiba dei ïaid bad tuid kane ka wah. Hadien ba la dep ban jurip bniah lyngba ka liengsuiñ ïa ki thaiñ ba la shah ktah jur kiba kynthup ïa ka Baliapal, Jaleswar bad Bhograi Block, u Myntri Rangbah u la ïathuh ha ki nongthoh khubor kumne, “Ka kynhun jong ki NDRF, lai tylli ki kynhun jong ka ODRAF bad phra tylli ki kynhun jong ki pulit pyllip ding ki la shah pyntreikam ha ka ban leit pyllait im ïa ai jingïarap ïa ki briew kiba don ha ki shnong ba la shah ktah.” U la bthah ruh ïa ki heh nongpynïaid distrik ba ki la dei ban nang pynsted ha kaba ïadei bad ki jingpyntreikam ban ai jingïarap ïa ki nongshong shnong, namar ba ki briew ki dang sahkut ha kiba bun ki shnong kiba la shah ktah jur na ka jingshlei um. U Myntri Rangbah u la ong ba ki nongshong shnong ha ki 35 tylli ki Gram Panchayat ki dang shah ktah jur bad ka jingtrei shitom mynta ka long ban ai jingïarap sha ki. Ka jingshlei jong ka wah Subarnarekha, Budhabalang bad Jalaka ka la wanrah ïa ka jingshlei um ha ka distrik hadien ka jinghap jong u slap uba jur. “Kumba ka long haduh mynta, ym pat ïoh khubor ei ei ban don ki briew kiba ïap ne mynsaw na kane ka jingshlei um,” u la ong.
U Majhi u la ong ba ki la don kumba 6 tylli ki Block bad kumba 8,000 hectares ka jaka rep kiba la shah ktah na ka jingshlei um.
Halor ka jingong ba ka sorkar Odisha ka la shim ki sienjam na ka bynta ban tehlakam ïa ka jingshlei um ha Balasore distrik, u Majhi u la bthah ïa ki Engineer-in-Chief (EIC) jong ka Water Resources Department ba kin pynkhreh ha ka ban pruid dur halor ki jinglong jingman ki ban neh.
Ka sorkar kan sa shim ïa ki sienjam ban weng ïa ki jingeh ha kaba ïadei bad ka jingshlei um ha Subarnarekha, la ong shuh shuh u Majhi.
