Shillong, Nailur 19
Ka jingap khmih lynti ban ïoh ïa ka Ïingdorbar Thawaiñ kaba thymmai jong ka Jylla ka la ïaid mynta 23 tylli ki snem bad ka jingtei ïa kane ka shlem jong ka jingsynshar paidbah kan dang shim por biang sa katto-katne namar bym pat lah ban pyndep kumba la buh por ban pyndep hapoh ka 30 tarik Nailur, 2024.
Naduh u snem 2001 ka Jylla ka la ap khmih lynti ban ïoh da kawei pat ka Ïingdorbar Thawaiñ hadien ba ka Ïingdorbar Thawaiñ kaba mynshwa kaba don ha Khyndai Lad ka la pluh noh 23 snem mynshwa.
Ka jingbuh por ban pyndep ka jingtei ïa ka Ïingdorbar ha Mawdiangdiang ka dei hapoh ka 30 tarik Nailur 2024.
Hynrei kaba paw ka long ba ki kam ki dang sahteng bad kan dang shim por sa katto-katne bnai ban pyndep.
U Lamphang ka Ïingdorbar Thawaiñ u Thomas A Sangma u la ong ba ka jingtei ka dang ïaid bad ka kham suki khyndiat.
Ka jingsuki ka dei namar ka jingkyrduh nongbylla ha ki khyndiat bnai ba la dep bad mynta ki la kham bun bad nang wan shuh shuh.
U Lamphang u la kren ruh shaphang ka jingpynneh ïa ka jingjyrngam jong ka sawdong-sawkun baroh kawei ha kane ka jaka ba tei ïa ka Ïingdorbar Thawaiñ.
Kumta u la lumlang ïa ki tnat bapher bapher naduh ka tnat Forest, Horticulture ban peit bad khmih ïa ki jingdonkam.
U Lamphang u la bthah ruh ïa ka tnat Arts and Culture ban pynwandur bha ïa ki bynta ba shapoh jong ka Ïingdorbar ha kaba yn don ruh ki khana shaphang ka Jylla Meghalaya bad ki khana jong ka Meghalaya Legislative Assembly ha kine 50-51 snem.
U Lamphang uba la lum ïa ka jingïalang, u la leit ruh ban peit biang ïa ka jingtei ïa kane ka Ïingdorbar ban sngewthuh ïa ka jingïaid jong ka kam.
