Shillong, Nailur 23
Ka Myntri ka tnat ka Koit ka Khiah ka Kong Ampareen Lyngdoh ha ka Lah Sngi U Blei ka la ong ba kam shym la don satia kano-kano ka jingleh klet ne leh sting na ka liang jong ki nongpynïaid ne nongsumar jong ka Nongpoh Civil Hospital, ban ai jingsumar ïa ka longkmie armet kaba la duh noh ïa i khunlung ba dang shu kha.
Kum ban shu kdew hangne, kawei ka longkmie kaba na ka shnong Umden Diwon, ka la mad ïa ka jingjia ba sngewsih hadien ba ka la kha ïa i khyllung ha ka jaka leit bar jong katei ka hospital bad khlad noh mar ïa dep kha.
Ha kaba ïadei bad kane, haba kren sha ki lad pathai khubor, ka Myntri haba kyntait ïa ki jingkynnoh ka la ong, “Mar ïa ïoh jingtip halor ka jingïap itei i khunlung, ka la thung ïa u ophisar ha ka kyrdan Joint Director ba un pynlong ka jingtohkit ban lum ïa ki jingtip halor kane ka jingjia”.
Ka Kong Ampareen ka la ong, katei ka longkmie ka dei kaba la shah sumar shuwa ha Umden Primary Health Centre bad namar ba kam da khlaiñ bad ba ka la pun ïa i khunlung ba dang 5 bnai eiei, kumta la pynkit noh sha Nongpoh Civil Hospital bad ïathuh ba kane ka longkmie ka la poi ha Nongpoh Civil Hospital ha ka por 3 baje mynstep bad la khmih ïa ka da ar ngut ki doktor ba don ha ka kam kynthup ka doktor Gynecologist.
Ka Myntri ka la ïathuh ba ki doktor ki la khmih ïa ka bad hadien ka la leit sha paiñkhana ryngkat ka jingsynran lang u kurim jong ka, hynrei sngewsih ka la mad ïa ka jinghap noh i khunlung ha kane ka por.
Ha kawei pat ka liang, ka la pynpaw ïa ka jingsngewsih sha kane ka longïing bad ha kajuh ka por ka la ban jur ba kane ka jingjia baroh ka la jia ym namar ka jingkheiñ sting jong ki nongsumar.
Haba kylli, ka Myntri ka pyntip ba ka Fact Finding Committee jong ka tnat ka la leit sha Nongpoh Civil Hospital bad ka la lum ïa ki jingtip kiba donkam.
