Yn wanrah da ki pulit na Garo Hills ban pahara ha Khasi-Jaiñtia namar ka ilekshon MDC

Na ka liang u Superintendent of Police ka East Khasi Hills, Bah Vivek Syiem u la ïathuh ba 5 pyrton ki pulit yn wanrah ban pahara ha ka ilekshon MDC.

Shillong, Rymphang 04

Ka Sorkar Jylla kan wanrah ïa ki pulit na Garo Hills ban pahara ha kane ka ilekshon MDC sha ar tylli ki Autonomous District Council (KHADC & JHADC) ka ban sa long ha ka 21 tarik mynta u Rymphang. Kane ka long khnang ba ka jingjied ïa ki nongmihkhmat sha kitei district council kan long kaba ïaid beit ïaid ryntih.

Haba pyntip ïa kane, u Commissioner & Secretary ka tnat District Council Affairs (DCA) jong ka Jylla, Bah Cyril V.D Diengdoh (IAS), u la ïathuh ba ka jingpynkhreh na ka bynta ki bor pahara la ïakren hapdeng ki Deputy Commissioner bad ki Superintendent of Police jong ki district.

U la ïathuh ba ka tnat pulit ka la pyntip ba ka la pynkhreh ban wanrah ïa ki pulit na Rilum Garo (Western Range) ban pahara ha Khasi bad Jaiñtia Hills District (Eastern Range) na ka bynta ka ilekshon MDC.

Na ka liang u Superintendent of Police ka East Khasi Hills, Bah Vivek Syiem u la ïathuh ba 5 pyrton ki pulit yn wanrah ban pahara ha ka ilekshon MDC.

Ka East Khasi Hills ka don 931 tylli ki jaka thep ‘vote’ (polling station), bad ki pulit kin don ha 34 tylli ki polling station kiba lah ban mih jingkulmar bad 5 tylli ki polling station kiba don jingma ha East Khasi Hills.

U Bah Vivek u la ong ba man ki polling station yn pynbun ïa ki bor pahara kynthup ki mobile patrol, tactical patrol, ki jaka talasi bad kiwei-kiwei ban pynthikna ïa ka jingïaid beit ïaid ryntih ka ilekshon.

Ha kaba ïadei bad ki jaka thep ‘vote’ ba lah ban don jingma, u Bah Cyril Diengdoh u la ong, halor kane ki Deputy Commissioner ki la lum ïa ki jingtip baroh bad phah pat sha ka tnat pulit ban leh ïa kaba donkam.

U la ong ba ki DC ki la ïakren ruh bad baroh kiba don bynta, kynthup ki seng saiñpyrthei bad ki Rangbah Shnong ban don ka jingïatreilang na ka bynta ka ilekshon kaba ïaid beit ïaid ryntih.

Une u heh ophisar u la ong ruh ba ka kamram ban pynïaid ïa ka ilekshon ka dei ha ki Deputy Commissioner (DC) bad ki Returning Officer (RO) ha ki district bad ki sub division.

“Baroh ki la pynpaw ba ki la pynkhreh bha ban pynlong ïa ka ilekshon kaba ïaid beit”, la ong Bah Diengdoh.

Ha kaba ïadei bad ka jingpynlut jong ka Sorkar na ka bynta ka ilekshon, une u heh ophisar u la ïathuh ba ka jingpynlut ba la buh ka long T.22 klur na ka bynta ka ilekshon sha baroh ar tylli ki district council. U la ong ba kane ka shong katkum ka jingdonkam hapoh ki district.