Kolkata, Nailur:
Ka Myntri Rangbah jong ka West Bengal ka Mamata Banerjee ka la phah sa kawei pat ka shithi sha u Myntri Rangbahduh u Narendra Modi ha kaba ïadei bad ka jingshlei um ha West Bengal, ha kaba la batai ba ka Damodar Valley Corporation (DVC) ka la pyllait ïa ka um na ki jaka den um khlem da ïakren shwa bad ka sorkar, ha kaba kane ka la pynshlei um ïa kiba bun ki distrik.
Ha ka jubab ba la ai halor ka shithi ba hashwa jong ka Banerjee sha u Myntri Rangbahduh, u Myntri jong ka sorkar kmie uba dei khmih ïa ka Jal Shakti u CR Paatil u la ong ba ki heh sorkar ki la pyntip shwa sha ki bor ba dei khmih halor ka jingpyllait um na ki jaka den um ka DVC, ha kaba kane ka la pyllait na kino kino ki jingjia basngewsih.
Ka Myntri Rangbah ka la ong, “Katba u Myntri ba don burom u la ong ba ïa ka jingpyllait um na ki jaka den um ka DVC la leh hadien ka jingïasoi bad ka jingïamynjurlangbad ka Damodar Valley Reservoir Regulation Committee, kynthup ka jingïamir jingmut bad ki heh ba dei khmih jong ka sorkar West Bengal, nga da kaba burom nga pyrshah halor kane ka jingong.”
Ka Banerjee ka la ong ba ha ka miet jong ka 16 tarik, Nailur, ka la kyrpad ïa u Chairman jong ka DVC ban pynkynriah por shwa ha kaba ïadei bad ka jingpyllait um, hynrei um patiaw ei ei. Ha kaba ïadei bad ka jingong ba ka sorkar jong ka kam shym la ai jingbit ha kaba ïadei bad ka jingpyllait ïa ka um kaba 2.5 lak cusecs, ka la ong ba ka la kyrpad ban pynduna ïa ka jingpyllait um ka ban long 2.3 lak cusecs ha ka por 4.34 janmiet ha ka 17 tarik, Nailur bad 2 lak cusecs ha ka por 5 baje janmiet.
