Khliehriat, Nailur 25
Ka Voice of the People Party (VPP) ha ka 25 tarik Nailur ka la leit ban ïakynduh ïa u Executive Engineer, PWD (Roads) Khliehriat Division, East Jaiñtia Hills District ban dawa maramot ïa ka surok Dkhiah Sutnga Saipung Moulsei Halflong Road (DSSMHR).
Ha kane ka jingleit ïakynduh, la ïalam da u Bah Damewanhi Rymbai Organizing Secretary ka Voice of the People Party (VPP) ha ka jingdonlang ki dkhot ka VPP na East Jaiñtia Hills District.
Ki Nongïalam ka VPP ha ka jingïakynduh ïa u Executive Engineer, PWD (Roads) Khliehriat Division ki la ong ba ka surok Dkhiah Sutnga Saipung Moulsei Halflong Road (DSSMHR) ka dei u thied snam jong ki nongshong shnong ka thaiñ namar ba ka pynïasoh ïa ka Khliehriat kaba dei ka nongbah jong ka District bad kiwei ki shnong ba hap hapoh ka 5-Sutnga Saipung Constituency.
La ong ba lyngba kane ka surok ki paidbah ki ïoh shibun ki jingmyntoi, hynrei phewse kane ka surok la slem bah ka la shah ieh shrah khamtam naduh ka shnong Sutnga shaduh Saipung kaba la pynsohsat shi katdei eh ïa ki paidbah ka thaiñ khamtam ha ka pang ka shitom.
Ki Nongïalam ka VPP ki la ong ba kane ka jingsniew jong kane ka surok kam dei tang mynta ne mynhynnin, hynrei la bun snem bha, bad ki briew ki la ïaishah shitom da ka jingkhmih lynti ba shisien ka sngi ka sorkar kan sa pynbha bad pynmiat ïa kane ka surok kumba bha kiwei ki surok.
