Shillong, Rymphang 03
Ka kyrtong ka National People’s Party (NPP) na Mawkynrew konstitwensi, ka Dr. Amanda Pakynteiñ ha ka Lah Sngi U Blei ka la ong ba kan bud ïa ki matti jong u Rev. J.J.M. Nichols Roy da kaba bat skhem bad pynjanai shuh-shuh ïa ka Khyrnit ba Hynriew jong ka Riti Synshar ka Ri.
“Nga sngew dei ban bud ïa ki matti jong u Rev. J.J.M. Nichols Roy, ban bat skhem, ban pynjanai bad ban bteng ïa ka Khyrnit ba Hynriew namar dei kane ka atiar kaba ai jingïada ïa ngi ki rit paid ‘riewlum, bad ka iktiar kaba skhem ïa ki Doloi, ki Sordar bad ki khlieh nongsynshar shnong,” ong ka Dr. Pakynteiñ hadien ka jingthep kyrteng na bynta ka ilekshon ban wan sha ka KHADC ha ISBT, Mawïong ha ryngkat ka jingsynran lang u kurim jong ka, uba long ruh u MLA ka Mawkynrew, Bah Banteidor Lyngdoh.
Ka Dr. Pakynteiñ ka la ban jur ruh halor ka synshar-khadar kaba khuid bad ka jingshai jong ki kam ki jam ha KHADC, kumjuh ka jingpynneh-pynsah bad ka jingkhuid jong ka mei-mariang.
Haba pynpaw ïa ka jingkyrmen skhem ha kane ka kynti, kane ka longkmie kaba dei ruh ka nonghikai ka la ong ba ynda ka poi sha ka thong, kan ïaleh katba lah ban synñiang ïa ki khynnah skul kiba mad jingeh.
Haba kylli la kan kren ne em halor ka mat ban pynphai biang ïa ka ‘Primary Education’ kaba mynshuwa ka hap hapoh ka jingpeit jong ka District Council (kaba la shim hadien noh da ka Sorkar) lada poi sha ka thong, ka la ong, “Hooid, ngan kren ïa kata.”
Hashuwa, ka la ong ba ka sngewshngaiñ naba ka shaniah ha ki khun ki hajar jong ka Mawkynrew konstitwensi kiba la ai ka jingshaniah ha ka, kumjuh u kurim jong ka kiba la theh lut ka jingieid ha ki paidbah.
Haba kylli halor ki mat ba kan leit sha u paidbah, ka la ong ba kumba ki paidbah ki la shaniah ha u kurim jong ka lyngba roi ka par kaba u la theh hapoh konstitwensi, ma ka ruh kan bud ïa kita ki dienjat jong u.
“Ka roi ka par bad ka jingpynneh-pynsah ïa ka riti-dustur jong ngi, ka jait ka khong, namar haba im ka jait jong ka longkmie, ka im ka ktien ka thylliej, ka im ka riti-dustur bad ka ri bad ka jaidbynriew,” ka la ong.
Na ka liang u Bah Lyngdoh uba la synran lang ïa ka kurim ha kane ka sngi, u la pynpaw ïa ka jingkyrmen skhem ban poi sha ka thong ha kane ka kynti namar ka jingkylla ha ka saiñ hima sima hapoh konstitwensi khlem da klet pat ïa ka jingtrei shitom ban ïoh kheit ïa u soh jong ka jingjop.
“Ha u 2019, ki paidbah nongkyrshan ki ong ba dei ban mih i kurim jong nga ha ka ilekshon MDC namar ki shaniah ha ka ïing ka sem jong ngi. Myn ha kane ruh, ngi slem namar ngi hap ap ïa ka rai jong u paidbah, ba ngin shu leh hi…em, ka shong beit ha ka mon kaba u paidbah u ai ka rai bad ngi sngap ïa uba bun balang…kata ka rai kaba pynlong ba in hap ïakhun biang i Kong Rit,” u la ong.
Shuh shuh u la bynrap, “Ha konstitwensi, kaba kongsan ki peit ïa u briew, ki nongshong shnong hapoh konstitwensi ki dei ki briew ba stad, ki peit ïa ka roi ka par. Ngim ju ieh ïa ki paidbah.”
