New Delhi, Nailur:
U Army Chief General ba la shong-thait u VK Singh bad u Director barim jong ka kynhun CBI, u M Nageswara Rao, ki la ïania halor ka jingkynnoh ba ka la don ka jingpynshitom beiñ bad leh be-ijot ïa ka briew kaba la ïatehktien bad u shipai ha ka jaka treikam jong ki pulit ha Odisha. Kane ka la jia ha Bhubaneswar, ha ka miet jong ka 15 tarik, Nailur bad ka la saphriang kylleng ha kaba ki la mih ki jingpyrshah jur na kiba bun. U General VK Singh, ha ka jingthoh jong u ba u la phah ha ka Social Media, u la batai shai halor ka jingshahleh jong kane ka briew, ha kaba u la ong ba kane ka kam ka long kaba “sngewlehraiñ bad kaba sngewshyrkhei.”
U General Singh u la pynrem jur halor ka jingleh jong kine ki pulit bad dawa ban leh eiei mardor ïa kito kiba la donkti.
“Baroh ki dei ban sngap ïa ka khun jong u heh shipai ba la shongthait. Kaei kaba la jia ïa ka ha thanat pulit ha Bharatpur kaba don ha Odisha ka long kaba sngewlehraiñ. U Myntri Rangbah ka Odisha u dei ban shimkhia kyrkieh pyrshah ïa ki pulit bad kiba ïarap bad ai jingïada ïa ki nonglehkam sniew kiba don ha ka Uniform,” la ong u General Singh ha ka jingpyllait khubor jong u.
Katkum ka jingïathuh na ka liang jong ka lanot, ka la pynshisha da kaba ong ba ka la shah shoh bad shah lehbeiñ hapoh thanat Bharatpur hadien ba ma ka bad u briew ba kan ïathoh ki la pyrshang ban ujor ejahar ha kaba ïadei bad ka jingjia kiba la mih ha surok ba ki la dei ïaid.
La kynnoh ba une u heh shipai u la shahkem beaiñ ha ki pulit. Ha ka jingkynthoh pyrshah, u Director barim jong ka CBI, u M Nageswara Rao, uba dei u IPS ophisar jong ka Odisha, u la batai da kumwei pat.
U Rao u la kyntait halor ka jingkynnoh jong u General Singh bad u la kynnoh ba utei u heh shipai bad ka briew kaba la don bad u ki dei kiba la buaid bad leh khlem akor.
“Une u heh shipai bad kane ka briew ki la dih kyiad bad ki la ñiah kali lyngba ka sor ha ka por miet. Ki la pynibor pyrshah bad ki samla pule Engineering bad hadien ki la thaw ïa ka kynrum-kynram ha thanat pulit ha Bharatpur. Haba la pan ïa ki ban leh ïa ka eksamin bad test snam, ki la kyntait, naba ka dei ka bynta kaba kongsan na ka bynta ban pynlong ïa ka jingtohkit,” la pynshisha u Rao.
U la ïada shuh shuh ïa ki pulit, da kaba ong ba ki pulit jong ka Odisha, kiba pynïaid ïa palat 600 tylli ki thanat, haduh mynta kim pat ju don daw ha ka ban leh khlem akor ïa ki briew kiba rung ha kine ki jaka treikam jong ki pulit, kynthup ïa ki shipai.
U Rao u la kyntu ïa u General Singh ban pyrkhat biang ïa ka jinglong jong u, da kaba bynrap ba kam long kaba dei ban pynshitom ïa ki pulit baroh tang namar ki kam jong uwei u heh shipai.
Ka sorkar Odisha kum shi bynta ban leh ïa kaba donkam halor kane ka jingjia, ka la wengkam shipor ïa 5 ngut ki pulit kiba donkti bad hukum ban pynlong ïa ka jingtohkit. Ka kynhun jong ki pulit kaba don bynta ha ka ban khmih bniah halor kum kine ki jingjia ha ka jylla ka dang pynlong ïa ka jingtohkit pyrshah ïa kiba la shah kynnoh, bad ka sorkar ka la ai jingïada ïa u heh shipai bad ïa ka briew jong u ha kaba ïadei bad ka jingjia.
Hadien ka jingïakynduh bad u Myntri Rangbah ka Odisha, u Mohan Charan Majhi, katei ka briew, ka la pynpaw ïa ka jingsngew shngaiñ bad kyrmen ba yn pynïoh ha ka ïa ka jingbishar bahok, da kaba pynpaw ba ka sheptieng na ka bynta ka jingim jong ka.
Ka la pynshisha ruh da kaba ong ba baroh arngut ma ka bad u heh shipai ki la pdiang ïa ka jingtyrwa jong ka sorkar ban ai bad pynïoh da ka Personal Security Officers (PSO) na ka bynta ban ïada ïa ka jingim jong ki.
