Jowai, Nailur 25
Ka shnong Panaliar ka la ujor sha u Deputy Commissioner (DC) jong ka West Jaiñtia Hills District pyrshah ïa ka Jaiñtia Fishing & Environmental Protection Association (JFEPA) halor ka jingthmu ban pynlong jingïakop khwai dohkha ne Fishing Competition.
Katkum ka jingujor kaba la soi da u Waheh Shnong Riquoma Rq. Laloo bad Marryngkat Syngkon General Secretary, la ong ba ka Jaiñtia Fishing & Environmental Protection Association (JFEPA) ka la pynkheiñ ïa ki kyndon aiñ jong ka shnong ha ki sngi ba la dep.
Kumta ha kaba ïadei bad kane ka jingïakob kaba thmu ban pynlong ha ka 28 tarik Nailur 2024, ka shnong Panaliar ka la rai ban ym shah ïa ki ban pynlong hapoh u pud u sam jong ka shnong.
Ka shnong Panaliar ka la kyntu ruh ïa u DC kum khlieh ka District ba un pynsangeh shisyndon ïa katei ka jingïakob khwai dohkha khnang ban wanrah ka shongsuk shongsaiñ hapoh shnong poh thaw.
