Kochi, Nailur:
U MLA jong ka seng CPI(M) kaba bat ïa ka bor synshar bad u khlur ak phlim u M Mukesh u la shah kem ha ka Sngi Ba-ar ha ka kynhun Special Investigation Team (SIT) halor ka mukotduma kaba la kynnoh pyrshah halor ka kam leh be-ijot jong u, hadien ka jingujor jong kawei ka khlur ak phlim.
U nongïasaid aiñ na ka liang jong u Mukesh, u la pynthikna ba la kem ïa utei u MLA, la pynlong ïa ka jingkhmih bniah bad la leh ïa ka Potency Test jong u bad hadien la pyllait noh ïa u namar ba la ai jamin lypa da ki ïingkashari ha basdang jong une u bnai. Ka jingshahkem jong u ka la long ha basdang jong une u bnai. Ïa ka jingshah kem jong u la buh jingthoh hadien ba ka kynhun SIT, kaba la pynlong ïa ka jingtohkit halor kane ka mukotduma pyrshah ïa u khlur ak phlim, ka la khot ïa u na ka bynta ka jingshah tohkit.
U Mukesh u la leit hajir hakhmat ka kynhun SIT ha Coastal Police Headquarter kaba don ha Kochi ha ka por 9.45 mynstep bad la tohkit ïa u haduh lai kynta shiteng. La buh jingthoh ïa ar tylli ki mukotduma pyrshah ïa u Mukesh, kawei da ki pulit ka Wadakkanchery bad kawei pat da ki pulit ka Maradu. Ka Kerala High Court ha ka sngi Balang ka la kyntait ïa ka jingpan jamin ba la buh lypa jong u khlur ak phlim Malayalam u Siddique ha ka mukotduma leh be-ijot kaba la mudui pyrshah ïa u katkum ka jingujor jong kawei ka khlur ak phlim. “La weng noh ïa ka jingkyrpad”, la ong u nongbishar C S Dias.
