Kolkata, Risaw:
Ki doktor khynnah jong ka West Bengal ki la sangeh syndon ban trei ïa ka kam jong ki ha kaba ïadei bad ki jingbym lah jong ka sorkar ban pynurlong halor ki mat ba ki la buh hadien ka jingjia shah leh be-ijot bad ka jingshah pynïap jong kawei ka doktor jong ka RG Kar, khyndiat taïew hadien ba ki la sdang ban leit trei biang sha ka kam tang ha ki Emergency Unit.
Kine ki doktor khynnah ki la sdang ban sangeh treikam hynnin ka sngi hadien ba ki la don shibun ki jingïakren sani bha hadien ka jingbishar bniah jong ka Supreme Court ha kaba ïadei bad ka jingjia kaba dang don mynta hapoh ka jingtoh-kit jong ka kynhun Central Bureau of Investigation.
Kine ki doktor ki la sdang leit trei biang ha ka 21 tarik, Nailur hadien ba ka sorkar ka la mynjur ban pynurlong ïa katto-katne tylli ki jingdawa jong ki bad kular ban sa pynurlong sa ïa kiwei pat.
Kumba la sakhi, kine ki doktor ki la ïathuh ba ka jingïakhih jong ki ka la long kaba don jingmut khamtam hadien ba la jia ka jingjia basngewsih.
Na ka liang jong ki ki la pynpaw ba kim kwah shuh ba kum kine ki jingjia kin dang ïai bteng khamtam ha kane ka Hospital naba la ïohi ba ki la don shibun ki jingdkoh pyntreikam kiba buh jingma ïa ka jingim jong ki khamtam haba ki don ha ka kam.
Hynrei ki doktor ki la byrngem ban sangeh trei biang lada jia ba ym lah ban pynurlong ïa baroh ki jingdawa jong ki, kiba kynthup ha kaba ïadei bad ka jingbuh jingshngaiñ na ka bynta jong ki ha ki jaka trei, ka jingweng kam ïa ki heh doktor, ka jingpynduh ïa ki jingap jingma jong ki ha kaba la sakhi ba ïa kine ym pat lah ban leh ei ei.
Wat lada ki pulit jong ka Kolkata ki la pynkloi ha ka ban kem ïa u Civic Volunteer u Sanjoy Roy ha kaba ïadei bad ka jingjia, ki doktor khynnah jong ka West Bengal ki la suba ba ki dang don shuh shuh sa kiwei pat kiba la donkti ha kane ka jingjia.
Ka jingjia ïa mynta ka dang ïaid ha ka jingtohkit jong ka kynhun CBI hapoh ka jingkhmih bniah jong ka Supreme Court.
Ka kynhun CBI ka la dep kem ïa u Principal barim jong ka RG Kar u Sandip Ghosh, ïa uba dang don mynta ha kti jong ki pulit halor ka jingshah kynnoh ba u la donkti ban pyndonkam bakla ïa ka pisa ha ka Hospital, bad ïa uwei u pulit uba la donkti ha ka jingjia.
