Shillong, Risaw 01
Hadien ba ka Sorkar Jylla ka la mynjur ban pyndonkam noh da ka QR Code lane Quick Response Code ha ki bitor kyiad, ka tnat Excise ka Jylla ka la buh ïa ka thong ban pynmih khajna palat T.500 klur ha une u snem mang tyngka ba mynta.
Lah ban pynkynmaw ba ka Kynhun Myntri jong ka Sorkar Jylla ha ka 25 tarik mynshem bnai, ka la ai jingmynjur ban pyndonkam noh da ka QR Code ha ki bitor kyiad kum kawei na ki lad ban khanglad ïa ka jinglait tuh ka khajna lyngba ka jingdie beaiñ ïa ka kyiad.
Kumba ka long mynta, ha ki bitor kyiad la ju pyndonkam da ki ‘Hologram’ ha kaba la ong ba kane kam shym la ïarap ha ka ban khanglad ïa ka jinglait tuh ka khajna.
Haba ïakren bad ki lad pathai khubor ha ka Sngi Ba-ar, u Myntri ba khmih ïa ka tnat Excise ka jylla u Bah Kyrmen Shylla u la ong, ka jingpynmih khajna jong ka tnat ka la nang kiew man la u snem bad mynta u snem, ka thong jong ka tnat ka long ban pynmih ïa ka khajna ba T.500 klur tam na kaba ju pynmih tang kumba T.200 ne T.300 klur eiei.
U Bah Kyrmen u la pyntip ruh ba ka tnat ka dang pynkhreh shaid-shaid ban pyntreikam ïa ka QR code ka ban buddien ïa ka jingïaid lynti ki mar khnang ban nang pynjanai ïa ka jinglum khajna bad pyntip ruh ba kane ka kam ka lah ban shim por hapdeng ar haduh lai bnai eiei.
Haba kylli, u Myntri u la pyntip ba ka tnat ka khlem pat pynkiew dor satia ïa ki mar bad ha ka jingshisha, ka dor jong ki mar mynta ka dang duna ban ïa ka dor ba la buh da ka Assam.
Ha kawei pat ka liang, u Myntri u la ong ba ka Sorkar Jylla ka kwah ban pynlong ïa ka Meghalaya kum kawei na ki Jylla ba pynmih bun eh ïa ki waiñ soh hapoh ka thaiñ. “Ngi kwah ban pynbun ïa ka jingpynmih wain bad ngi kwah ban pynlong ïa ka Jylla jong ngi kum ka jaka pynmih wain soh kaba bun eh. Kane kan shim katto katne por,” u la ong.
U Bah Kyrmen u la ong kumba ka long mynta, la ïohi ba ki nongrep mynta ki la tip kumno ban tyngkai ïa ki soh kiba sniew kaba ki ju bret noh ha ki por kiba mynshwa namar ka jingbym lah ban die hynrei mynta pat kila pyndonkam ïa ki ban shna wain.
Shuh shuh u Myntri u la pyntip ba ïa mynta, ka tnat ka la ai ka jingkyrshan ïa ki nongshna waiñ da kaba ai ïa ka jaka ba kin ïoh jinghikai kumno ban shna wain.
Haba kylli pat la ka Sorkar ka don jingthmu ban ithuh noh da ka aiñ ïa ki nongshna kyiad pyrsi, u Myntri u la ong, halor kane, yn nym pat lah ban ong eiei bad kaei ka lynti ban ïaid shakhmat, namar baroh ki tip ba ïa ka kyiad pyrsi la shna na u khaw uba dei u jingbam ba kongsan eh.
