Patna, Risaw:
Ka sorkar kmie ka la shim ki sienjam na ka bynta ban ai jingïarap ïa ka sorkar Bihar ban ïakhun ïa ki jingeh kiba mih na ka jingshlei um hadien ka jingpyllait ïa ka um ba la shlei na ka jingther jong u slap na Valmiki Nagar bad Birpur Barrage kiba don ha ka bynta shaphang Shatei jong ka Bihar hadien ka jingther jong u slap ha ka ri ba marjan ha Nepal. U Myntri ka sorkar kmie uba dei khmih ïa ka tnat ki kam pohïing u Nityanand Rai u la ong ba lada donkam, ïa ki shipai ka tnat Airforce yn sa pyntreikam na ka bynta ban ïoh pyllait im bad ai jingïarap ïa ki lanot na ki thaiñ ba bun kiba la ngat ha ka jingshlei um ha ka bynta ba shaphang Shatei jong ka Bihar. U la ong ba wat ïa ki song jingbam yn pynhap na ki liengsuiñ sha ki shnong kiba la shah ktah jur, lada donkam.
Ha ka jingïakren bad ki nongthoh khubor hadien ba la don ka jingïalang bad ki heh sorkar, u Rai u la ong ba ka sorkar kmie ka la khmih bniah bad ïai buddien bha ha kaba ïadei bad ka jingshlei um ha Bihar. “Ngi la pynkhreh ban leh ei ei ha kaba ïadei bad ki jinglong jingman, kiba la nang ktah jur ïa ki katto katne tylli ki distrik,” u la bynrap. Ki la don kumba 9 tylli ki kynhun jong ki National Disaster Response Force (NDRF) kiba la shah pyntreikam ha ki distrik kiba la shah ktah na ka jingshlei um bad ki la don shuh shuh ki kynhun kiba dang shah pynap, ha kaba ïa kine yn sa phah hadien ka jingbthah jong ka sorkar jylla. Ki pulit NDRF ki la don lypa ha ka kam, u la bynrap.
U Additional Chief Secretary jong ka State Disaster Management Department Pratyaya Amrit u la ïakren halor ki mat ba ïadei bad ka jingshlei um ha ka jingïalang ba u la pynlong. Ki District Magistrates jong ki distrik kiba la shah ktah na ka jingshlei um ki la shah bthah ban buh bad pynap lypa ïa ki jaka sah ba shipor na ka bynta ki lanot shlei um. Ka um ba la pyllait na kine ki jaka den um kin sa ktah ïa palat 16.28 lak ngut ki briew ha ki 13 tylli ki distrik, la ïathuh ka tyllong khubor kaba la wan na ka tnat State Disaster Management bad la sakhi ïa ka jingshlei jong kiba bun ki wah.
